Siha Sittah
Pou banne savants de hadice, Siha Sittah signifié les six livres authentique de hadice:
Ça banne livres-là zotte contenir banne hadice authentique. Quant à banne hadice faible ki trouve dans Nisaa-ï, Tirmizi, Abou Dawoud et Ibn Majah, zotte bien minime. Et ça pas empêche qualifié zotte de banne livres authentique.
Quand appelle ça banne livres-là authentique, ça à aukene moment pas signifié ki banne hadice Saheeh (authentique) zotte renfermé dans ça six livres-là seulement. Ena ene qualité hadice ki authentique mais ki capave pas trouve dans ça six livres-là. Donc faudré pas faire erreur rejette ene hadice pou la simple raison ki li pas trouve dans ça six livres-là. Coumsa même li ene grand erreur rejette banne hadice ki pas trouve dans Sahih Boukhari et Sahih Mouslim. Parceki selon Al-Isma-ili, Imam Boukhari fine déclaré:
"لم اخرج فى هذا الكتاب الا صحيحا وما تركت من الصحيح اكثر" (هدى السارى)
"Mo pas fine rapporte narien apart ceki authentique dans ça livre-là. Banne hadice authentique ki mo fine quitté, li plis ki ça."(Hadyus-Saari)
Imam Muslim aussi jamais fine pretanne ki li fine couvert tous banne hadice Sahih dans so Sahih Mouslim.
C'est-à-dire ena encore boucou hadice Sahih mais ki pas trouve dans ça deux livres-là. Li vrai ki banne hadice dans Sahih Boukhari et Sahih Mouslim zotte banne hadice bien authentique. Mais ça li pas ene raison pou dire ki lezot banne hadice zotte pas authentique parceki nou pas capave servi ene ki pli authentique comme prétexte pou qualifié ene ki moins authentique de pas authentique.
Ene erreur pli grave
C'est ça même erreur grave ki ene certaine groupe fine faire quand zotte refuse accepté hadice comme ene l'autorité dans Deen sous prétexte ki li pas authentique et catégorique couma Qour'aan-e-Kareem. C'est ene kitchose bien grave et dangereux ki Nabi r fine mette l'Oummah en garde conte ça. C'est ene façon ki donne l'occasion mal interprète Qour'aan-e-Kareem.
Li bon conné ki sans hadice nou pas pou capave comprend Qour'aan. Coumsa même sans l'aide banne Aimmah, nou pas pou capave conne la vrai signification et porté hadice de Nabi r . Donc couma li important passe par hadice pou comprend Qour'aan-e-Kareem correctement, coumsa même li bien important servi recherche de banne Aimmah pou capave comprend hadice correctement. Ça montré ki la bonne compréhension de Deen li depanne lors comprend hadice de Nabi r à lumière recherche banne Aimmah parceki recherche de banne Aimmah li ene garant pou hadice et hadice li garantie l'interprétation correcte de Qour'aan.
Autocritique - Dans ki façon nou bizin pensé?
"Mo ene humain. Mo ena mo banne défauts couma mo ena aussi banne bon coté. Mo doit Allah Ta'ala pou ça banne bon coté-là et mo remercié li sans ki mo sous-estime banne ki pena li et sans ki mo mette moi dans rang vis-à-vis lezot. Mo regrette banne manquements et banne défauts ki mo ena et mo dimane Allah Ta'ala protection. Mo bizin faire le maximum zeffort pou débarrasse moi de ça banne manquements-là."
C'est dans ça façon-là ki chaque dimoune bizin pensé pou capave ena changement dans mentalité et dans façon vive. Parceki chaque dimoune li pli capave corrige so propre défaut ki défaut so camarade. Donc li bizin faire ene travail ki li pli capave faire li au lieu li essaye faire ceki pli difficile. Dans essaye faire difficile même ki la situation pé vine de plus en plus difficile parceki nou pé faire zeffort mais li pas dans place ki bizin faire li. Donc nou bizin faire pli boucou zeffort pou dresse nou même.
Gaspillage
Principalement ena deux façons de gaspillage. La première façon cote ene dimoune li bizin dépensé mais li dépense plis ki bizin. Ça en plis-là c'est ene gaspillage. Et ça qualité gaspillage-là appelle li Is-raaf ki li haraam.
Ena ene deuxième qualité gaspillage. C'est-à-dire ene dimoune dépense so la monnaie cote pas gagne droit même dépensé.
Exemple
Par exemple ene dimoune dépense so la monnaie dans casino, dans joué le course, dans acheté film, dans alle guette cinéma, dans dépense la monnaie pou faire chanté-dansé etc. Dépense la monnaie cote pas gagne droit dépensé appelle Tabzeer.
Qour'aan-e-Kareem et gaspillage
Qour'aan-e-Kareem qualifié banne ki dépense zotte la monnaie cote pas gagne droit dépensé de banne frères de shaitaan. Donc d'après Qour'aan, banne ki dépense zotte la monnaie dans banne kitchose haraam, c'est banne frères de shaitaan.
Gaspillage dans mangé-boire
Nou faire boucou gaspillage dans mangé-boire. Par exemple quand nou mangé, nou prend dans nou plat ene quantité ki nou pas capave mangé. Si nou calcule la quantité mangé ki nou jette dans poubelle tous les jours, nou pou trouvé ki ça li capave suffit pou nourri ene ou deux dimoune en plis. Dans ene le monde cote ene quantité dimoune pena mangé, li bien chagrinant banne ki ena, zotte pé faire gaspillage. Chaque grain du riz et chaque goûte de l'eau c'est faveur Allah Ta'ala. Faudré pas nou maltraite ça faveur-là.
Quand nou assizé pou mangé, nou prend ene tigite ki nou capave mange li. Et si bizin, nou capave prend ene deuxième fois encore. Ça pou empêche nou faire gaspillage. Faudré pas nou jette ene la grain du riz aussi parceki nou pou bizin repone pou chaque grain du riz et chaque goûte de l'eau ki nou fine capave gaspillé. Ça genre de gaspillage-là nou capave trouve li surtout dans banne mariage.
Gaspillage de l'eau
Nou ena ene l'autre qualité gaspillage. C'est gaspillage de l'eau. Gaspillage de l'eau li tellement pas bon ki pas gagne droit servi li plis ki bizin quand même pou faire ghoussal ou bien pou faire wazou.
Zordi jour nou ena ene mauvais manière laisse de l'eau allé plis ki bizin quand nou faire wazou dans masjid. Li bon conné ki li ene très bon travail quand nou pé faire wazou. Mais ça aussi li nécessaire conné ki nou pé faire ene grand erreur quand nou pé servi de l'eau plis ki bizin pou ça travail-là.
Gaspillage dans lave l'auto
Parfois le cœur faire mal quand ou trouve ça quantité de l'eau ki gaspillé dans lave l'auto. Ou trouve gros de l'eau pé alle dans vide dans canal et dimoune-là li dans conversation avec kikene. Nou tous conné ki c'est ou même ki pou paye facture ça de l'eau-là mais eski ça li ene raison ki ou capave laisse li alle dans vide? Définitivement non!
Ena ene l'autre catégorie ki prend de l'eau dans jardin public pou lave so l'auto. Sane-là li ene ti pé pli grave parceki d'abord li pé gaspillé et deuxièmement li pé gaspille de l'eau ki pas pou li.
Gaspillage dans illumination
Coumsa même nou trouve grand grand illumination à l'occasion mariage ki coûte bien cher. Et ça li duré parfois pendant ene semaine. Et d'après renseignement ça li coûte à peu près 70 à 75 mille roupies. Ki utilité ena dans dépense ene somme aussi conséquent. C'est ene la folie et ene mal dépense. Et ça li haraam sans réserve. Ça kitchose-là nou trouve li parfois dans masjid aussi. Banne 'Oulama et banne Fouqaha (Juristes) zotte tous d'accord ki ça li pas permette. C'est ene mal dépense et li haraam.
Réaction tout à fait logique
Ki ou pou faire si kikene faire boufon avec ou famille?
Définitivement ou pas ça fou-là ki ou pou riyé ou bien ou pou félicite ça dimoune ki pé dénigré ou famille. Et si jamais ou casse ene grand riyé dans ene situation semblable, dimoune pou ena parfaitement raison si zotte qualifié ou de ene ki pena l'amour propre.
Tout dimoune content so mama papa et so banne zenfant. Li tout à fait normal ki ene dimoune senti li humilié et blessé si kikene boufonne so mama papa ou bien so la famille. Et si fallait parfois li capave expose so la vie aussi pou sauve l'honneur de so la famille. Nabi r li cher à ene musulman plis ki so mama papa, so la famille et l'humanité entier. Par ça nou capave gagne ene l'idée de ceki ene musulman capave faire quand kikene insulté so Nabi r .
Faire nouveauté
"من احدث فى امرنا هذا ما ليس منه فهو رد"
"Celui ki introduire dans ça system ki nou ena-là ene kitchose ki pas trouve là-dans, alors c'est ene kitchose ki bizin rejeté."(Sahih Boukhari)
Ça system ki Nabi r fine mentionné, li faire référence avec Deen. Donc d'après ça hadice-là, tout kitchose ki ene dimoune introduire dans Deen ki li pas forme parti là-dans, c'est ene kitchose ki bizin rejeté.
Ene kitchose ki pas dans Deen si kikene faire li avec l'impression ki li dans Deen, alors ça même ki nou appelle bid'ah. Et d'après hadice ça même qualité bid'ah ki li ene l'égarement ki amene vers l'enfer.
Ene kitchose dans Deen
Ene kitchose dans Deen c'est ene kitchose ki li basé lors Qour'aan-e-Kareem ou bien lors sounnat de Nabi r . Coumsa même ene kikchose ki basé lors la pratique banne Khulafa-e-Rashideen ou bien la pratique ki ti en vigueur chez banne salaf aussi li ene kitchose de Deen. Similairement ene pratique approuvé par recherche et ijtihaad ene mujtahid aussi li considère comme ene pratique dans Deen. Donc ene pratique en dehors Deen ou bien ene bid'ah, c'est ene pratique ki pas approuvé par aukene source de ça banne source-là.
Selon Allaamah Ash-Shatwibi, Hazrat 'Oumar Bin Abdul Azize (R) ti dire ene kitchose ki Imam Malik (R) ti bien apprécié ça:
"سن رسول الله صلى الله عليه وسلم وولاة الامر من بعده سننا الاخذ بها تصديق لكتاب الله واستكمال لطاعة الله وقوة على دين الله ليس لاحد تغييرها ولا تبديلها ولا النظر فى شئ خالفها من عمل بها مهتد ومن انتصر بها منصور ومن خالفها اتبع غير سبيل المومنين وولاه الله ما ولى واصلاه جهنم وساءت مصيرا"
"Rassouloullah r fine institué banne principes et aussi banne dirigeants ki fine vine après li. L'adoption ça banne principes-là c'est ene confirmation de livre Allah, ene complémentaire pou l'obéissance Allah et ene la force dans Deen. Personne pena le droit amène kit changement ou kit modification là-dans ni kikene ena droit prend en considération kitchose ki oppose ça. Celui ki fine pratique ça, li lors droit chemin. Celui ki fine cherche recours avec ça, li gagne le succès. Celui ki oppose ça, li fine suive ene l'autre chemin apart chemin banne musulmans. Allah Ta'ala pou laisse li avec so principe et li pou mette li dans Jahannam. Et ça li bien pas bon comme ene refuge."
Eski gagne droit mange tripe?
Selon ene hadice ki trouve dans Maraasil Abou Dawoud, Tabraani, Mouswannaf Abdurrazzzaq et Sounan Al-Baihaqui, Rassouloullah r fine désapprouve la consommation de 7 parties depi dans ene bouc. Pou banne 'Oulama, ça règle-là li pas restreint à ene bouc seulement. Ça li applique pou tous zanimau ki halaal consommé. Donc d'après ça hadice-là, c'est necque ça sept parties ki Rassouloullah r fine désapprouvé-là ki haraam. Et tripe li pas trouve dans ça sept parties ki Rassouloullah r fine désapprouvé. Donc li halaal. Si nou inclure tripe là-dans, li pou vine huit. Li pas pou reste sept ki Nabi r fine mentionné. Dans ça cas-là li pou ene l'ajoute lors ceki Nabi r fine précisé et ça li bien pas bon.
Donc tripe li halaal acoze ki Nabi r pas fine mentionne li dans ça sept kitchose ki li fine désapprouvé. Alors ene dimoune gagne droit pas mange li si li délicat mais li pas gagne droit qualifié li de makrouh ou bien haraam.
La liberté ou la tyrannie
La liberté pas veut dire ki ou capave faire ceki ou oulé. Parceki ceki ou oulé, ça aussi li bizin ena ene limite. Si jamais ou oulé ene kitchose ki faire ou prochain du tort, alors ou bizin pas oulé ça kitchose-là. Donc ou pas capave libre et jouir liberté à ene stage ki nuire lezot. Ça genre de liberté-là li ene liberté ki satisfaire zisse ene poignet dimoune au détriment de la plus grande majorité. C'est ene liberté ki seulement banne gros le bras et banne ki pli fort ki capave jouir ça. Ça montré ki ça genre de liberté-là li pas ene liberté réelle. Mais plitot c'est l'anarchie sous couverture de liberté cote la loi du pli fort li régné ki faire la vie dimoune vine ene la vie l'enfer. Nou bizin ene liberté cot tout dimoune capave senti li libre et protégé. Pou amène ça genre de liberté-là, nou bizin reconnaite droit nou prochain. Nou pas gagne droit reste libre à ene stage ki offense ou bien blesse lezot. Donc vrai liberté pas capave existé sans respecté droit lezot. Ene liberté ki bafoué droit lezot, c'est la tyrannie ki attire la colère divine. La colère divine li manifesté dans différent forme. Ça li capave manifesté à travers soulèvement dans plusieurs formes de la part ça banne opprimés-là. Faudré pas sous-estime ça banne opprimés-là. Parfois circonstance faire ene chat vine ene lion. Bizin prend précaution et pas laisse ene situation pareil arrivé.
Apostasie
Apostasie ou bien quitte l'Islam et alle dans ene l'autre la religion li ene péché bien bien grave.
L'Islam li pas force ene dimoune pou rente dans Deen ni li mette kit pression pou ene dimoune accepté li. Ene non-musulman li capave vive dans ene l'état islamique et li capave pratique so religion aussi là-bas. Mais ene fois ki ene dimoune fine embrasse l'islam, astere li bizin continué reste ene musulman même. Si jamais li rejette l'Islam après avoir accepté li, li vine ene mourtadd. Et ene mourtadd li mérite exécution et la peine de mort comme punition. Nabi r fine dire:
"Celui ki change so la religion, alors touye li."
Ki veut dire change la religion?
Change religion signifié change religion l'Islam pou adopté ene l'autre religion. Donc d'après ça hadice-là, ene dimoune ki change so la religion l'Islam et li rente dans ene l'autre religion, li mérite la peine capitale.
Gravité l'apostasie
Apostasie li pli grave ki Kufr. C'est-à-dire ene dimoune ki rejette Islam après avoir accepté li, li vine pli détestable ki ene dimoune ki jamais fine rente dans l'Islam. C'est acoze ki ene dimoune pareil li ene traître. Et punition ene traître li ene ti pé pli dur ki punition ene adversaire au clair de tout le temps. D'ailleurs ça li ene façon pou décourage lezot ki capave pé pense pou rente dans Deen. Donc d'après shariah, quitte l'Islam après avoir accepté li, li haraam et bien grave et bien détestable. Si kikene dire ki ça li permette, c'est ene kitchose ki li pé inventé ki pas existé dans l'islam. C'est ene l'ajoute ki li pé faire dans l'Islam.
Autorise l'apostasie
Ene musulman pas capave autorise apostasie ou kufr. Ene kaafir même capave autorise ene kitchose pareil. Si ene musulman arrivé faire ene bêtise pareil, li sorti en dehors l'Islam. Li vine ene apostat. Banne individus ou banne organisations ou banne sociétés ki aide kikene propage l'apostasie, zotte tous vine kaafir et mourtadd.
Quand ene dimoune quitte so Deen Islam et li rente dans ene l'autre religion, alors so nikah cassé. So hajj annulé et tous so banne ibaadat alle dans dilo.
Fermeté lors Deen
Quand Hazrat Sa'd Bin Abou Waqqaas t fine embrasse l'Islam, so mama fine mauvais mécontent. A tel point ki li fine menace pou arête mangé-boire tanque ki li pas quitte l'Islam. Mais Hazrat Sa'd Bin Abou Waqqaas t pas fine cédé. Au contraire li fine faire so mama conné ki si so mama ti ena 100 la vie et li donne tous ça 100 la vie-là, là aussi li pas pou quitte ça Deen-là.
Valeur Iman
Hercules ti offert à Hazrat Abdullah Bin Huzafah t pou faire li vine so partenaire dans so royaume mais avec ene condition ki li vine ene chrétien. Mais Hazrat Abdullah Bin Huzafah t fine rejette ça l'offre-là carrément. Li dire si to donne moi tout ceki to possédé et ceki banne Arabes possédé zisse pou mo quitte ça Deen-là quand même pou ene clin d'œil, ça aussi mo pas pou faire li. Lors ça Hercule fine menace pou touye li. Là aussi li pas fine cédé. Finalement quand zotte pé prend li pou mette li dans difé, li commence ploré. Hercule ti pensé ki astere li pou accepté change so la religion mais li fine étonné pou tanne li déclaré ki li chagrin ki li ena ene seul la vie. Li ti souhaité ki li ti ene-ene la vie lors chaque poil ki ena lors so le corps afin ki li ti capave sacrifié tous ça là pou faire so Rabb plaisir.
Remarque:
Iman li ene fortune inestimable et inégale ki mérite sacrifié tout zisse pou capave sauve garde li. Dimoune ki conne so valeur, si fallait li joué lors so la vie aussi pou préserve li. C'est ça l'amour ki ene dimoune ena pou so Rabb ki faire li content so Iman ça quantité-là. D'après ene hadice, le degré pli fort de Iman c'est content Allah Ta'ala et so Rasool r plis ki tout kitchose. Tout kitchose vine facile pou ene dimoune ki gagne ça degré de Iman-là. Tout kitchose dévalué dans so regard. Li accepté pou faire face à toute sorte situation. C'est manque de Iman ki faire ene dimoune néglige so Deen par banne fausse prétextes. Quand ene dimoune pena ça Iman-là, li vanne Deen Allah Ta'ala pou so l'intérêt personnel. Li préfère plaire so banne patron au lieu so vrai patron Allah Ta'ala.
"O Allah! Faire nou content Toi et To Habeeb Hazrat Mouhammad r plis ki tout kitchose. Ameen"
Ceki pli difficile
Ene dimoune li capave vine ceki li envi par so banne zeffort. Et ça li facile. Par exemple li facile pou vine ene Hafiz ou bien ene Aalim ou bien ene Mufti ou bien ene islamologue ou n'importe ki logue ou envi. Coumsa même li pas difficile pou vine ene médecin ou ene ingénieur ou n'importe ceki ou oulé. Mais ceki difficile et bien difficile, c'est ki ene dimoune vine ene dimoune dans le vrai sens du mot.
Pou ene dimoune vine ene dimoune dans le vrai sens du mot, li bizin libère li de banne vilain manière couma égoïsme, jalousie, vantardise, l'orgueil, hypocrisie etc. Li bien chagrinant et malheureux pou trouve banne dignitaire dans la société prisonnier de ça banne vilain manière-là. C'est ene l'épidémie ki pas fine épargne personne. Dimoune ena tendance faire zeffort dans banne domaines ki profitable matériellement. Parceki zotte attiré par le monde matériel. Mais si zotte pas faire zeffort pou débarrasse zotte de ça banne mauvais manières-là, c'est acoze ki zotte pas trouve aukene profit matériel. Au contraire zotte trouve li ene obstacle pou zotte progrès dans dounia. Et zotte trouve zotte succès dans pas corrige zotte erreur. Acoze ça la majorité pas gagne tracas corrige zotte. C'est voila comment nou pé vive dans ene monde cotte ena dimoune ki pas dimoune dans le vrais sens du mot.
|