Hadith lors Halaal/ Haraam et douteux

الحلال بين والحرام بين وبينهما مشتبهات لا يعلمها كثير من الناس فمن اتقى المشبهات استبرأ لدينه وعرضه ومن وقع فى الشبهات كراع يرعى حول الحمى يوشك ان يواقعه الا وان لكل ملك حمى الا ان حمى الله فى ارضه محارمه الاوان فى الجسد مضغة اذا صلحت صلح الجسد كله واذا فسدت فسد الجسد كله الا وهى القلب - البخارى

Traduction:

Halaal li bien clair et haraam (aussi) li bien clair. Et entre ça deux-là ena boucou kitchoses ambiguës ki boucou dimoune pas conne zotte (position légale). Celui ki évite banne kitchoses ambiguës, veut dire ki li fine protège so Deen et so l'honneur et celui ki tombe dans banne kitchoses ki ena doute, li couma dire ene berger ki faire (ene troupeau zanimau) brouter autour de ene réserve en sorte ki ena tout possibilité li capave tombe là-dans. Tout le roi ena ene réserve. Certainement Allah Ta'ala so réserve lors so la terre, c'est banne kitchoses ki li fine interdit. Certainement ena ene morceau la chaire dans le corps quand li dressé, entier le corps dressé et quand li corrompu, entier le corps corrompu. Attention ça morceau la chair-là c'est le cœur." (Boukhari)

Explication:

Halaal li bien clair signifié ene kitchose ki couvert et régi par ene texte de loi ki autorise ça kitchose-là dans ene façon categorique. Par exemple la viande bœuf, mouton, cabri etc.

Coumsa même haraam li bien clair veut dire ene kitchose ki régi par ene texte de loi ki defanne ça kitchose-là dans ene façon nette et claire par exemple mensonge, zina, la viande porc etc. Entre ça deux kitchose-là ena ene catégorie ki appelle مشتبهات (moushtabihaat).

 Ki veut dire moushtabihaat?

C'est ene kitchose ki ena ene genre de confusion parceki ena tous les deux possibilités. C'est-à-dire li capave halaal couma li capave haraam acoze ki ena tous les deux qualités preuve. Quand nou guette ene, li donne l'impression ki li bizin halaal et quand nou considère l'autre preuve, ça faire nou hésité et empêche nou accepté li comme halaal.

 Règlement concernant Moushtabihaat

 Dans ene situation cote ene dimoune tombe dans ene dilemme pareil, Nabi Sallallaahu 'alayhi Wassallam conseille li pou reste loin et pas alle de l'avant. Selon Nabi Sallallaahu 'alayhi Wassallam, c'est ene moyen pou ene dimoune préserve so Deen et so l'honneur. Pou explique ça, Nabi Sallallaahu 'alayhi Wassallam fine donne nou ene l'exemple cote li fine compare banne kitchose haraam avec ene réserve. Couma ene dimoune ki amène so troupeau pou broute l'herbe près avec ene réserve ena toute chance ki so troupeau rente dans réserve, coumsa même ene dimoune ki faire négligence concernant banne kitchose douteux, li prend ene grand risque tombe dans haraam. Et conséquemment li mette en danger so Deen et so l'honneur. D'après ene l'autre version de ça hadice-là ki trouve dans Sahih Boukhari, Rassouloullah Sallallaahu 'alayhi Wassallam fine dire:

"فمن ترك ما شبه عليه من الاثم كان لما استبان له اترك ومن اجترأ على ما يشك فيه من الاثم اوشك ان يواقع ما استبان"

"Celui ki évite ene kitchose ki ena doute, li pou pli évite ça kitchose ki bien clair-là. Par contre celui ki hasardé lors banne kitchose ki douteux, alors li très probable ki li capave tombe dans banne kitchose ki bien évident."

 C'est-à-dire quand ene dimoune faire négligence concernant banne kitchose douteux, après ene certaine le temps, facilement dimoune-là capave tombe dans kitchose ki haraam. Par contre ene dimoune ki prend précaution avec banne kitchose ki douteux, li pou pli prend précaution avec banne kitchose ki haraam. Donc garde distance avec banne kitchose douteux, li servi comme ene barrière ki protège la personne conte kitchose ki haraam couma négligence concernant banne kitchose douteux li risse la personne dans kitchose ki haraam.

Ene kitchose li continué reste Moushtabih (douteux) tanque ki li reste dans ene dilemme ki empêche prend ene décision finale. Mais ene fois ki fine réussi sorti depi dans dilemme et fine réussi prend ene décision finale, ça kitchose-là li nepli reste Moushtabih. Dans ce cas bizin prend en considération preuve ki paraite pli fort et pli solide. Mais pas tout dimoune ki ena capacité et l'aptitude faire banne analyses pareille.

D'après ça hadice-là, c'est necque ene ti minorité même ki capave faire ça. Et ça c'est banne Moujtahid.

Ki veut dire ene Moujtahid?

 La loi Shariah li sorti particulièrement depi dans Qour’aan-e-Kareem et dans hadice. Nou ena deux qualités la loi:

(a)         منصوص          -  C’est ene texte de loi ki mentionné explicitement et clairement.

(b)        غير منصوص - C’est ene texte de loi ki impé ambiguë ou bien ki pas mentionné. Bizin comprend li entre les lignes.

Ça deuxième qualité la loi ki pas claire, dimane zeffort pou être clarifié et élucidé à la lumière banne principes et banne règles général établi par shariah. Faire le maximum z’effort pou clarifié et explique banne textes de loi ki pas claire appelle اجتهاد.

 Celui ki ena la capacité, l’aptitude et la compétence pou faire اجتهاد appelle مجتهد  (Moujtahid). ‘Aalim ena plusieurs degré et plusieurs niveau. Moujtahid c’est ene degré pli avancé et pli haute de ene ‘Aalim. C'est necque recherche et analyse de ça même niveau de banne 'Oulama ki pou valable en ceki concerne ene Moushtabih.

Précaution:

Ena plusieurs niveau de précaution ki nou capave prend concernant ene kitchose ki ena doute. Et ça li varié selon le degré de doute. Si doute-là li fort, alors précaution-là aussi pou ene ti pé pli fort. Mais si ena ene ti doute, alors ene précaution léger aussi li suffit. Par exemple Nabi Sallallaahu 'alayhi Wassallam ti hésité pou mange ene tamme ki ti tombé lors la rue zisse acoze ki li ti ena doute ki peut-être li capave ene tamme de sadaqah ou de zakaat. Li pas ti ça important-là pou évite ene kitchose pareil mais ti ena ene ti possibilité ki ça ti capave être ene tamme de zakaat ou de sadaqah. Mais pas ti ena narien à perdi dans pas mange li. Acoze ça Rassouloullah Sallallaahu 'alayhi Wassallam fine préfère abstenir.

Coumsa même quand ena soupçon lors ene dimoune ki so transaction pas bon, alors li préférable pas accepté li. Amoins si fine établir dans ene façon nette et catégorique ki ça kitchose ki li pé donné-là so provenance li haraam. A ce moment-là li haraam pou accepté li. Coumsa même quand ene doute li basé lors ene critère bien fort, bizin abstenir de ça kitchose-là couma ça prouvé par hadice Hazrat Adi Bin Hatim Radhiyallaahu ‘anhu

Hadice Hazrat Adi Bin Hatim (Radhiyallahu anhu)

Hazrat Adi Bin Hatim (Radhiyallahu anhu) ti habitué la chasse avec so li chien. Alors Rassouloullah Sallallaahu 'alayhi Wassallam ti donne li la directive suivante:

"... فان وجدت مع كلبك كلبا غيره وقد قتل فلا تاكل فانك لا تدرى ايهما قتل" (البخارى)

Traduction:

"… Si ou trouve ene l'autre li chien ensam avec ou li chien acote gibier ki fine fini mort, alors pas mange li parceki ou pas conné lequel entre ça deux-là fine touye li …" (Boukhari)

Nabi Sallallaahu 'alayhi Wassallam fine empêche li consomme ça gibier-là zisse acoze présence ene l'autre li chien ki fine ranne li douteux. Parceki li possible ki ça l'autre li chien-là fine la chasse li. Normalement ene li chien ki fine la chasse ene gibier par li même ou bien kikene fine largue li derrière ene gibier sans faire bismillah, alors ça signifié ki ça gibier-là li pas halaal. C'est necque quand kikene fine largue ene li chien ki fine entraîné et fine lire Bismillah avant largue li ki so gibier li halaal.

Principe à adopté dans banne kitchose ki ena doute

Quand ena doute dans ene kitchose, d'abord bizin guette position ça kitchose-là d'après shariah. Si d'origine, ça kitchose-là li permette et li halaal, alors li pou continué reste halaal. Banne doutes ki vine dans l'esprit et ki pena aukene preuve ki soutenir li, pas capave affecté position ça kitchose-là.

Par exemple ene dimoune fine faire nikah en bonne et due forme. Alors so nikah pou continué reste valable. Ça nikah-là pas pou affecté avec banne doutes ki li capave ena concernant talaaq. Tanque li pas sure ki li fine donne so madame talaaq, so madame pou reste so madame et so nikah pou reste intacte. D'après ça même principe, si ene dimoune li rappel bien ki li ti faire wazou, mais li pas rappel si so wazou fine cassé, alors so wazou pou continué reste valable tanque li pas sure ki li fine cassé.

Ene l'autre l'exemple

 Si ene dimoune gagne doute dans namaz ki so wazou fine cassé, alors li bizin continué so namaz et li pas gagne droit casse so namaz tanque li pas sure ki so wazou fine cassé.

Similairement si ene kitchose d'origine li haraam et interdit, alors li pou continué reste haraam tanque pas gagne preuve ki li halaal. Par exemple la chaire ene zanimau li haraam amoins si fine faire zabah ça zanimau-là d'après principe de shariah. Donc dans ce cas tanque pas assuré ki conditions et règlements de shariah fine être respecté dans faire zabah, pas pou gagne droit consomme so la chaire.

Coumsa même si dans ene panier ena banne poules mort ki fine mélangé avec banne poule halaal en sorte ki pas capave distingue banne poules ki halaal, alors dans ce cas pas pou gagne droit touche aukene poule là-dans.

Bref quand ene kitchose li halaal d'origine, li pas pou vine haraam tanque pas gagne ene preuve catégorique ki prouvé ki li haraam. Coumsa même quand ene kitchose li haraam d'origine, alors li pas pou vine halaal tanque pena preuve catégorique ki prouvé ki li halaal.

Was-wasa

 Quant à banne supposition rare et lointaine, bizin pas prend compte parceki ça li vine de coté shaitaan ki oulé fatigue banne dimoune dans Deen. Par exemple ene madame li tire linge lors la corde et li relave li avec l'impression ki banne zenfants fine capave touche ça banne linges-là avec la main ki ena impureté. Ou bien ene madame li lave la corde avant li mette linge sec par l'impression ki capave ena impureté lors la corde. Ou soit ene dimoune li lave banne pièces d'argent avant li garde zotte dans so poche par l'impression ki ça fine capave passe dans banne la main ki ena impureté. Bizin pas prend banne doutes pareille en considération.

 Le cœur

Ene dimoune so comportement li dépanne d'après l'état de so le cœur. Si so le cœur li en bonne santé, veut dire ki so comportement en général aussi pou correcte. Par contre si ena kit manquement ou kit défection dans so le cœur, ça pou reflecté lors so comportement.

Dans ça hadice-là, fine mentionne le cœur ki normalement signifié ça l'organe ki trouve à gauche de la poitrine. Pareille couma les cinq sens l'odorat, l'ouïe, le goût, la vue et le touché, zotte fonctionne apartir néné, zoreille, palais, lizié et la main respectivement. Coumsa même ena ene sens bien subtile ki basé et fonctionné apartir le cœur. D'après banne 'Oulama, Rassouloullah Sallallaahu 'alayhi Wassallam fine servi le terme "le cœur" zisse comme ene repère pou signifié ça sens subtile-là.

Toujours selon banne 'Oulama, ça sens-là c'est le centre d'attraction de Noor (lumière) de Hidayah (guidance). C'est ça même Noor ki faire ene insaan vine insaan. Quand Qour'aan et hadice cause purification du cœur ou de l'âme, ça li signifié la purification de ça même sens-là. Pou être pli simple, nou capave appelle ça kitchose-là mentalité. D'après ça hadice-là, tout dépanne lors ene dimoune so mentalité. Quand so mentalité li dressé, ça li ena ene l'effet très positif lors so comportement. Par contre avec ene faille mentalité, ene dimoune pou agir toujours mal. Rassouloullah Sallallaahu 'alayhi Wassallam fine attire nou l'attention vers la nécessité pou purifié le cœur parceki ça même c'est la base de la réussite humaine.

Ça hadice-là amène nou pou comprend ki commette banne kitchose haraam, li contamine le cœur ki à son tour affecté le comportement général de ene dimoune. Pou remédié le problème, Rassouloullah Sallallaahu 'alayhi Wassallam conseille l'Oummah pou garde so distance non seulement de banne kitchose ki haraam, mais aussi de banne kitchose douteux afin pou assure ene prévention complète. Dans ene l'autre hadice, Nabi Sallallaahu 'alayhi Wassallam fine exprime ça l'idée-là dans le terme suivant:

"لا يبلغ العبد ان يكون من المتقين حتى يدع ما لا باس به حذرا لما به باس"

Traduction:

"Ene dimoune pas capave atteine le niveau pou être parmi banne personnages pieux tanque ki li pena la volonté pou quitte ene kitchose ki pena narien de grave zisse comme ene mesure de précaution pou pas tombe dans ene kitchose ki ena certaine gravité."

C'est-à-dire banne bon dimoune zotte pas hasardé. Zotte prend boucou précaution à tel point ki zotte reste loin de banne kitchose permissible aussi si ça capave vine ene moyen pou tombe dans banne kitchose ki pas permette.

Par Le president de JUM

Moufti M.Ruffick Meerun