Salaf et Salafi

Salaf veut dire ene kitchose ki fine déjà passé. Banne grand parents ou banne ancêtre appelle zotte Salaf parceki zotte fine vive dans ene passé lointain.

Ancêtre li capave être ene ancêtre biologique ou ene ancêtre idéologique. Nou ancêtre ou bien Salaf idéologique c'est banne Sahaba-E-Kiraam et banne Tabe'ines parceki nou fine gagne Deen depi Rassouloullah ‎(Sallallaahou A'laihi Wasallam)‎ à travers zotte même. Donc en ce qui concerne Deen quand nou dire Salaf, sa appliqué pou banne Sahaba-E-Kiraam ‎(Radiyallahou anhoum‎)‎ et banne tabe'ines. Banne Salafi c'est banne qui suive banne Sahaba-E-Kiraam et banne tabe'ines en ceki concerne Deen.

Imam Abou Hanifah (rahmatoullahi `alayh) ti ene Tabe'i. Donc suive Imam Abou Hanifah (rahmatoullahi 'alayh) c'est ene façon pou être Salafi.

Ena dimoune appelle zotte Salafi acoze ki zotte prétende pas suive aukene Imam. Zotte prétende suive Qur'aan et hadice directement. C'est ene fausse prétention parceki zotte suive Imam mais Allah Ta'ala conné ki faire zotte honté pou admette ki zotte suive Imam.

Suive Imam li pas ene la honte sa. C'est ene facon pou applique la loi Divine. Applique la loi divine capave vine ene kitchose de la honte? Jamais parceki d'après Qur'aan quand ou pas conné ou bizin suive banne ki conné. (V7:S21)

Pas nou même ki dire ki perna 'Alim dans Maurice? Quand perna 'Alim, alors bizin reste pas conné? D'après Qur'aan quand ou pas conné, ou bizin dimane banne ki ena connaissance et sa même ki appelle taqleed.

Quand nou donne ene kikene renseignements lors Deen, nou oulé ki li accepté li et li mette li en pratique lor nou confiance. Malgré ki sa personne là li perna capacité pou distingue banne preuves, nou autorise li suive nou sans ki li comprend. Mais sa même dimoune nou pou empêche li suive ene Imam Abou Hanifah ou bien ene Imam Malik. Suive ene Imam couma Imam Abou Hanifah (rahmatoullahi `alayh), ou bien Imam Malik (rahmatoullahi 'alayh) ou bien Imam Shaafe'i (rahmatoullahi `alayh) li pas permette mais suive banne la bougie ki près pou teigne li obligatoire! O Allah! Protége nou tous de ene raisonnement pareil!

[Extrait de Al Jamiat Vol.1 No.4]