Couvert la tete

Faire namaz sans couvert la tête li pas ene bon façon faire namaz. Coume sa même li pas ene tenue convenable pou faire namaz avec ene T-shirt ou bien avec ene chemise manche courte. Qour'aan-e-Kareem fine servi la formule "Zeenat" au lieu "Libaas" (habit) cote li fine ordonne pou habillé au moment de chaque namaz. Zeenat signifié beauté. Evoquant la raison pou laquelle fine servi "Zeenat" au lieu "Libaas", banne 'Oulama-e-Deen fine dire ki Qour'aan fine servi "Zeenat" au lieu "Libaas" pou montré ki ene mouswalli li bizin non seulement couvert so le corps, mais li bizin adopté ene tenue ki convenable au point de vue esthétique. Faudré pas li habillé couma li gagné. Li bizin habillé dans ene façon respectable parceki dans namaz li fine présenté devant Rabb-oul-A' lameen. Pas n'importe ki sanla. Donc bizin évite tou tenue ki montré légèreté et négligence dans namaz. Pas couvert la tête, mette T-shirt ou chemise manche courte li pas ene tenue respectable. Donc li makrouh pou faire namaz dans ene tenue pareil.

A ce stade li très important pou conné ki banne juristes fine dire ki si kikene faire namaz sans couvert la tête par négligence, alors dans ce cas là li makrouh. Mais si kikene pas couvert la tête par mépris pou la pratique de couvert la tête alors ça c'est ene koufr ça. Bizin faire boucou attention.

Concernant couvert la tête ou pas couvert la tête dans namaz nou bizin agir avec beaucoup de sagesse. Faudré pas nou mal juge dimoune et surtout nou banne jeunes ki malgré toute sorte de tentations ki ena en dehors, zotte pé trouve ene ti le temps pou vine faire namaz dans masjid. C'est ene kikchose ki mérite être apprécié. Zotte sincère et zotte pé agir d'après ceki zotte conné. Faudré pas mal agir avec zotte acoze ki zotte fine mette T-shirt ou chemise manche courte. Après tou, zotte namaz li compté parceki ceki essentiel c'est couvert le corps depi enbas nombril juska genou. Mais bizin éduque zotte pou capave amene amélioration dans zotte. Ça peut être pou prend ene bon boute le temps mais pou bizin ena ene bon résultat. Même si nou pas gagne l'occasion guette ça bon résultat-là, nou bizin plante z'arbre-là pou au moins le zot gagne l'ombrage enbas sa après nou.

[Extrait de Al Jamiat Vol.1 No.5]