Khutbah en creole?

L'OPINION DE BANNE AÏMAH (R)

L'école de pensée Hanafite:-Pas gagne droit faire khutbah dans ene l'autre langage apart langue arabe.

L'école de pensée Hambalite:-Pas gagne droit faire khutbah dans aukene langage apart langue arabe.

L'école de pensée Shafi'ite:-Li nécessaire faire Hamd (louange) pou Allah et Daroud Shareef en langue arabe dans Khutbah. Apart ça li Sounnat pou servi langue arabe. Selon ene l'autre l'opinion ki fine considéré comme plus correcte, bizin faire khutbah en arabe pou ki Khutbah compté.

L'école de pensé Malikite:-Khutbah bizin être en langue arabe.

Voila d'après tous les 4 l'école de pensée, pas gagne droit faire Khutbah dans aukene langage apart arabe. Donc pas gagne droit faire Khutbah en créole.

... PAS FAIRE JUMMAH ...

Faudré pas alle faire Jummah dans ene masjid cote pé faire Khutbah en créole. Parceki faire Khutbah dans ene l'autre langue apart langue arabe li contre le principe de Rasouloullah et la pratique adoptée par tous les musulmans de tous les époques. Faire khutbah en créole c'est ene façon pou vine en conflit avec le principe ki fine toujours adopté par l'oummah depi l'époque de Nabi ‎(Sallallaahou A'laihi Wasallam)‎. Li grave pou l'oummah en entier et surtout li bien grave pou la personne ki introduire ça bid'ah là.

Raçouloullah ‎(Sallallaahou A'laihi Wasallam)‎ fine dire: "Celui ki introduire ene mauvais principe dans l'oummah, li pou gagne péché de ceki li fine commette et aussi banne péché de tou ceux ki pratique ça après li."

Sans doute faire khubah en créole li ene BID'AH et ene MAUVAIS PRINCIPE ki bizin évité à tout prix.

L'UNITÉ ET LE KHUTBAH EN CRÉOLE

La langue arabe c'est la langue de Qour'aan-e-Kareem et de hadice. C'est la langue de banne Jinnah. C'est ça même langage ki capave unir l'oummah au niveau international. La langue ki l'oummah servi dans banne ibaadat c'est la langue arabe. Khutbah aussi li ene ibaadat important à tel point ki fine interdit tou banne transactions et occupations mondaines afin pou capave écoute khutbah. Le zikr ou ibaadat de khutbah fine toujours être accompli en langue arabe depi l'époque Rasouloullah ‎(Sallallaahou A'laihi Wasallam)‎. Le changement de langage dans khutbah li représente ene changement dans structure même de ça ibaadat-là. Change structure ene ibaadat li très grave. Li ene moyen et ene façon pou rane ibaadat en question invalide. Li couma dire faire 4 rakaat maghrib au lieu de faire 3 rakaat.

Rasouloullah ‎(Sallallaahou A'laihi Wasallam)‎ fine dire:

"Celui ki introduire ene kikchose étranger dans nou système, alors li rejeté." (Boukhari)

Faire khutbah en créole ou n'importe ki langage apart langue arabe li ene kikchose étrangère. Donc li ene kikchose inacceptable ki pé subdivise la communauté déjà déchiré et divisé - et ça aussi sans aukene utilité, sans aukene profit, sans aukene l'avantage apart crée la haine, rancune et l'ennemité au sein de l'oummah.

Rasouloullah ‎(Sallallaahou A'laihi Wasallam)‎ fine abandonne juska même banne kikchose recommandé et louable juste pou l'oummah pas tombe dans confusion et juste pou pas ena dissension. Par exemple Rasouloullah ‎(Sallallaahou A'laihi Wasallam)‎ ti abandonne l'idée pou reconstruire Ka'bah Shareef d'après le plan ki li ti été dans l'époque Hazrat Ibrahim ‎(Alaihis Salaam)‎‎. Et cela juste pou pena dissension et banne dimoune pas tombe dans confusion. Astere faire khutbah dans ene l'autre langue apart arabe ki pas meme bénéficié statut de "Moubaah" aussi, ki quantité li important pou abandonne li quand na perna aukene bénéfice apart crée division.

KHUTBAH LI PAS ENE CAUSERIE

Khutbah li pas ene causerie couma tou causerie. Li ene causerie ki pas nécessaire dimoune comprend pou li compté. Si fine faire khutbah divant banne sourde ki pas tende narien, ça pas empêche khutbah compté. Cela acoze ki le porté de zikr li plus fort là-dans. Acoze ça même dans Qour'aan-e-Kareem et dans hadice fine appelle li zikr.

MASJID OU CINÉMA?

Si nou prend li dans le sens ene causerie ordinaire couma tou banne causerie, alors li pas trop loin pou nou trouve nou dans ene l'époque cote pou diffuse ene causerie lors l'écran dans masjid dans place kikene bizin vini pou faire khutbah. Tout ça la pou arrivé quand nou dire ki khutbah c'est ene causerie et causerie bizin comprend. Donc, bizin faire li dans ene langage ki dimoune comprend. La nouvelle génération pou continué ça raisonnement-là et zotte pou dire ki khutbah li ene causerie et l'essentiel dans ene causerie c'est transmette le message. Alors pas nécessaire ene dimoune dérangé vini pou faire li. Capave faire li à travers cassette, video et banne moyens disponible dans ça l'époque-là.

Ça pou arrivé surtout quand ene grand personnage pou rende nou visite à Maurice pou ene séjour très court. Alors pou faire li faire ene khutbah dans ene certaine l'endroit et faire diffuse ça dans tous banne masjids. Dans ça l'époque-là nou banne masjid pou vine la salle cinéma. (Na'ouzoubillah)

FAIRE CAUSERIE AVANT KHUTBAH

La pratique de faire causerie avant faire khutbah li daté depi l'époque Hazrat 'Oumar ‎(Radiyallahou anhou‎)‎. Hazrat Tameem Daari ‎(Radiyallahou anhou‎)‎ ti pé faire causerie enbas mimbar juska ki Hazrat 'Oumar ‎(Radiyallahou anhou‎)‎ ti pé vini pou faire khutbah lors mimbar. Donc la pratique de faire causerie en bas mimbar avant faire khutbah lors mimbar couma li en vigueur chez nou, li ene pratique ki ti existé dans "Khairoul-Qouroun" (les meilleures époques) et ki ti approuvé par le deuxième calife de l'Islam, Hazrat 'Oumar ‎(Radiyallahou anhou‎)‎. Kitchose ki autorisé et approuvé par banne califes ou ene calife, li sounnat selon les dires même de Rasouloullah ‎(Sallallaahou A'laihi Wasallam)‎ cote li dire:

"... Suive mo Sounnat et Sounnat de banne califes ..."

'Allamah Ibn Taymiyah (rahmatoul­laahi 'alayh) dire ki suive le Sounnat de banne califes c'est absolument obéir à Allah Ta'ala et Rasouloullah ‎(Sallallaahou A'laihi Wasallam)‎. Donc dans cette optique, la pratique en vigueur de faire causerie enbas mimbar avant faire khutbah lors mimbar li encadré avec le principe de Sounnat. Voila dans ki façon, ça causerie ki faire enbas mimbar en langue locale li dispense nou du but ki nou oulé réalisé par faire khutbah en langue créole.

[Extrait de Al Jamiat Vol.1 No.5]