Roza jour Arafah

D'après ene hadice de Rasouloullah ‎(Sallallaahou A'laihi Wasallam)‎ roza ki ene dimoune observé le jour de Arafah, li faire efface so banne péchés de ene l'année avant et ene l'année après. (Mouslim)

Le jour de Arafah c'est le neuvième jour de Zulhijjah. Dans ça jour-là même banne hajis zotte rassemblé dans la plaine Arafah. Ça 9eme jour-là bizin calcule li d'après calcule dans chaque région. Li pas nécessaire ki quand pé garde ça roza-là banne hajis zotte bizin dans Arafah. Parceki si pour guette coumsa, ena pays pas pour capave garde ça roza-là. Ena pays soit zotte roza capave pé fini terminé avant même ki banne hajis vine dans Arafah ou bien ena pays acote zotte roza capave pé commencé quand banne hajis fine fini quitte Arafah.

Acoze ça chaque l'endroit bizin garde ça roza-là ça jour ki tombe le neuvième zulhijjah d'après so calcule. D'après le principe ki Rasouloullah ‎(Sallallaahou A'laihi Wasallam)‎ fine enseigne nou, ene mois li terminé soit par visibilité la nouvelle lune ki prouvé par témoignage satisfaisant ou bien li terminé quand 30 jours de ça mois-là fine fini passé.

Quand ene mois terminé, automatiquement l'autre mois pour commencé. Quand le commencement de Zulhijjah fine établi en suivant ça banne principes-là, alors le neuvième jour li pour ça jour ki li recommandé garde roza de Arafah. Astere pas bizin guetté ki tel ou tel pays ki pé faire et ki pas pé faire. Bizin garde ça roza-là et célébré Eid d'après calcul dans l’endroit ki ou été.

"Ene fois le jour de Arafah, Hazrat Aisha ti garde roza. Hazrat Masrouq ‎(Radiyallahou anhou‎)‎ dire li eski ou pas peur pour garde roza zordi ? Ki conné li capave jour Eid zordi. Hazrat Aisha dire li ki le jour de Nahr (Baqrid) c'est ça jour ki tout dimoune célébré." (Mouswannaf Abdurrazzaaq)

D'après ceki Hazrat Aisha fine repone, nou comprend ki chaque dimoune bizin suive le calcule de so l'endroit. Li bizin garde roza de Arafah ça jour ki tombe le 9eme jour de Zulhijjah et coumsa même li célébré Eid d'après calcule so l'endroit sans prend compte ceki pé arrivé ailleurs.

[Extrait de Al Jamiat Vol.1 No.6]