Lire Qour’aan…

Qour'aan et lire Hadice - comprend Deen - enseigne Deen et pratique Deen; tout sa la c'est banne différent kitchoses. Ene pas signifié nécessairement l'autre. Quand ene kikene lire Qour'aan et hadice dans ene langage ki li conné, ça pas veut dire ki li comprend li aussi bien. Coumsa même quand ene kikene ki fine comprend, pas veut dire ki li capave enseigne li aussi bien. Li capave comprend li bien mais li possible ki li pena ene bon style pour enseigne li. Donc ene ki pas conne explique bien pas signifié ki li pas conné. Ene bon Aalim capave pena ene bon style et l'art pour adresse la masse. Mais ça pas veut dire ki li pena connaissance. Ça pas affecté et pas dire narien concernant so compétence dans connaissance de Deen. Couma ene ki ena le style pour attire la masse pas nécessairement li ena ene bon connaissance dans Deen.

Ene l'autre probleme...

Nou ena l'autre problème. Et problème-là li assez sérieux ki mérite l'attention. Quand ene dimoune enseigne quelque chose dans Deen, ça pas dire ki li ena aussi dans li ceki li pé enseigné. Très souvent nou déchiffré/ explique ene verset ou ene hadice ou ene anecdote ki dimoune reste tendé. Nou aussi de nou coté nou faire maximum z'effort pour perfectionne nou explication afin ki li capave descende dans le coeur. Mais bien peu parmi nou prend tracas et faire z'effort ki bizin faire pour faire ça rente dans nou d'abord. Li vraiment ene grand manquement dans la vie ene Daa-'ï (prédicateur) et c'est ene de banne raisons principales ki rende nou da'wah sans l'effet.

Ene l'exemple

Fine arrive mo même ene incident ki fine faire moi réfléchi beaucoup. Mo tipé faire wazou quand soudain mo fine trouve ene dimoune fine vini et fine commence uriné dans l'endroit ki ti fine réservé pour faire wazou. Mo fine crié avec la personne sans prend la peine écoute la personne ki fine oulé raconte moi so problème. Balle ti fini parti. Quand tou fine fini astere mo fine rappelle ene incident ene ti peu pareil ki ti passé dans l'époque Rasouloullah ‎(Sallallaahou A'laihi Wasallam)‎. Selon l'anecdote, ene personne fine rente dans masjid Nabawi et fine commence uriné dans ene coin dans masjid. Banne Sahaaba-e-Kiraam ‎(Radiyallahou anhoum‎)‎ fine galoupé pour crié avec la personne ki ti en pleine action. Mais Rasouloullah ‎(Sallallaahou A'laihi Wasallam)‎ ni fine crié avec li ni fine laisse banne Sahaba-e-Kiraam (radwiyal-laahou 'anhoum) interrompe li. Quand li fine fini, Rasouloullah ‎(Sallallaahou A'laihi Wasallam)‎ fine appelle li ene coté et fine faire li comprend avec calme ki c'est ene l'endroit ki pas bon faire banne kikchose pareil.

Ça fine faire moi réalise erreur ki mo fine faire dans la façon d'agir dans ene circonstance pareil. Au niveau causerie, mo fine capave explique ça hadice-là ki peut être ene quantité dimoune fine satisfait et fine flatte moi.

Ene grand l'echec

Mais mo reconnaite ki au niveau pratique mo fine échoué. C'était ene grand l'échec pour moi. Ki Allah Ta'ala pardonne moi et donne moi le tawfeeq agir couma bizin dans ene circonstance pareil.

[Extrait de Al Jamiat Vol.1 No.8]