Zikroullah

Tout dimoune content cause kitchose ki li content. Ene amateur football li prend plaisir dans cause football. Ene buveur li bavé quand li tanne whisky. Ene amateur le course pou reste dans faire vision banne cheval. Ene bon musulman, li aussi li senti li soulagé quand li pense so véritable bien aimé. Ene musulman, so véritable bien aimé c'est Allah Ta'ala. Donc ene bon musulman senti ene tranquillité extraordinaire et ene grand soulagement dans pense Allah Ta'ala.

Le désir pou reste pense ene kitchose, li indique le degré de l'amitié ki ene personne ena avec ça kitchose-là. Parceki sans l'amitié et sans appréciation, ene dimoune pas capave content pense ene kitchose. Donc c'est l'amitié ki ene personne ena avec Allah Ta'ala ki faire li pense Allah Ta'ala. Astere pli ene dimoune so l'amitié li fort pou Allah Ta'ala, pli li reste engagé dans "Zikroullah" (pensée Allah) et li éprouve ene plaisir extraordinaire dans tanne nom Allah Ta'ala.

Quand nou préfère tanne banne chanté au lieu Tilaawatoul-Qour'aan - Quand nou préfère assize divant l'écran TV ou divant l'écran cinéma au lieu écoute ene causerie - Quand nou prend plaisir dans cause causé ene acteur, actrice ou ene footballeur au lieu cause causé nou véritable bien aimé Allah Ta'ala - dans ça banne moments-là nou bizin ranne nou compte ki nou ena ene Imaan malade et paralysé. Ça indique la faiblesse de croyance ki nou ena dans Aakhirat. Préfère l'autre kitchose ki Allah Ta'ala, c'est ene manière de banne ki pas croire dans Aakhirat. Préfère l'autre kitchose apart Allah Ta'ala, li faire ene musulman vine dans même rang avec banne ki pas croire dans Aakhirat. Pas croire dans Aakhirat c'est kufr ça. Eski nou pas pé commette ça genre de kufr-là sans ki nou ranne nou même compte? C'est ene question ki chakene parmi nou bizin pose li.

"Et le temps mentionne Allah - li tout seule, banne ki pas croire dan Aakhirat zotte gagne dégoût dans zotte le coeur. Et le temps mentionne les zotte apart li, Ep! Ala zotte content." (S39/V45)

Rasouloullah ‎(Sallallaahou A'laihi Wasallam)‎ fine montré nou ene zikr ki si chacun de nou faire li 100 fois matin et 100 fois tantôt, li pou dans protection Allah Ta'ala:

لَا اِلٰهَ اِلَّا اللّٰهُ وَحْدَهٗ لَا شَرِيْكَ لَهُ لَهٗ الْمُلْكُ وَلَهُ الْحَمْدُ وَهُوَ عَلٰى كُلِّ شَيْءٍ قَدِيْرٌ

"Na pena narien ki mérite être adoré excepté Allah, li tout seul. Li pena aukene associé. Le royaume li appartenir à li même. Li même mérite tout louange. Et li ena pouvoir lors tout kitchose."

Pou ene départ, li bon nou commence faire ça zikr-là ki à la fois li ene moyen pou gagne protection Allah Ta'ala et aussi so l'amitié.

[Extrait de Al Jamiat Vol.1 No.8]