Zouloum ou l’injustice

Quand ene dimoune mérite ene kitchose, bizin donne li sa kitchose-là. Pas donne ceki ene dimoune mérité appelle zouloum. Dimoune ki faire zouloum appelle li zaalim et la personne ki subir zouloum appelle li mazloum. Ene zaalim li ena ene compte pou rendé cote Allah Ta'ala et li reste sous la colère Allah Ta'ala pendant toute longue so la vie tanque li pas arrête faire zouloum. Quand ene mazloum (opprimé) so le coeur fer mal, pena aukene barrière entre li et Allah Ta'ala. C'est à dire Allah Ta'ala accepté so doléance et li prend action conte le zaalim. Si Allah Ta'ala même finne décide pou prend action conte kikene, alors ki sanla capave protége li. C'est dans sa façon-là ki ene zaalim reste tout le temps sans protection et ene coup en traite li capave gagne attrapé. Et apart sa dans tribunal Allah Ta'ala li pou bizin reponne cote aukene l'influence pas pou capave servi pou empêche la justice suive so cours.

La personne ki coupable de zouloum, pou bizin dédommage so victime. Dédommagement pas pou faire avec l'argent ou richesse mondaine. D'abord pou servi banne bonne actions ki le coupable fine faire pou dédommage so victime. Si so banne bonne actions pas assez, alors li bizin prend banne péchés so victime lors so la tête. Li pas facile du tout ki ene ou perdi tout saki ou ti ena et deuxième ou assize lors charge les zotte!

Favoritisme

Boycotte ene ki mérité, pou donne ene l'autre ki pas mérité li ene zouloum (l'injustice). Sa genre de zouloum ki reconnaite par favoritisme ou népotisme, li pratiqué normalement par banne ki trouve à la tête ene établissement. D'abord ene l'injustice envers la personne ki fine être boycotté et deuxièmement li ene l'injustice envers toute la nation ene pays. C'est parceki la population en général zotte pas gagne ene bon service a cause l'incompétence sa personne ki fine être sélecté par favoritisme.

Pli grand zouloum

Shirk ou bien associé kikene avec Allah Ta'ala c'est pli grand zouloum. Parceki c'est necque Allah Ta'ala li tout seul ki mérite être adoré. C'est ene droit Allah Ta'ala. Associé kikene avec Allah Ta'ala ou bien adore ene l'autre apart Allah Ta'ala li pli grand zouloum parceki fine rasse droit Allah Ta'ala et finne donne li à ene ki pas mérité du tout dans aukene façon. Acoze sa so punition aussi li bien sévère. Ene ki mort lors shirk sans faire tawbah, pou reste pou tout le temps dans l'enfer.

"Certainement celui ki fine associé (kikene) arec Allah, alors Allah pou faire Jannat haraam lors li et so refuge pou dans du feu." (S5/V72)

[Extrait de Al Jamiat Vol.1 No.9]