Voyager sans mahram

Ene madame pas gagne droit voyage ene distance de 48 miles li tout seul. Li bizin ena ene mahram avec li. Sinon li pou coupable d’après Shariat. Li bon conné ki ça distance 48 miles-là li d’après millage Shariat ça. Ene mile d’après Shariat li de 2000 yards au lieu 1760 yards.

D’après hadice nou trouvé ki Rasouloullah ‎(Sallallaahou A'laihi Wasallam)‎ fine empêche ene madame voyage ene distance moins ki ça aussi. D’après banne ‘Oulama, voyage ene distance moins ki ça li appliqué juste à cote ena danger et l’insécurité pou madame-là. Quant à ene voyage de 48 ou plis ki 48 miles li pou empêché, même si li paraite ki perna aukene danger aussi. Mahram pou ene madame c’est ene zomme avec ki li pas gagne droit marié dans aukene circonstance, couma madame-là so papa, so frère, so neveu, so chacha, so maman, so nana, so dada etc...

Bizin mette dans la tête bien ki cousin ou bien cousin so zenfants, zotte pas mahram. Coumsa même poupa, kalou, beau-frère (missié so sœur), banne dimounes ki bizin faire pardah avec zotte parceki zotte pas mahram.

Quand nou dire ki ene madame pas gagne droit voyage ça distance-là sans mahram, li pas ene kitchose ki applique pou voyage de hajj ek ‘Oumra seulement couma banne dimounes ena tendances à croire. Li ene kitchose applique lors toute sortes de voyage couma voyage de promenade ou de commerce ou ene l’autre genre de voyage couma ene voyage pou alle étudié ou apprane.

[Extrait de Al Jamiat Vol.1 No.13]