Mesage à banne Da-ï

Banne frères ki fine engage zotte dans travail de Da'wah, zotte bizin conné ki travail de Da'wah li pas aussi facile. Ena boucau difficulté et ena banne sacrifice à faire. Alle de porte à porte et quitte madame zenfant pou alle l'autre pays dans ene seul but pou faire Allah Ta'ala plaisir, c'est ene travail ki Allah Ta'ala donne à faire li à banne ki Allah Ta'ala vraiment content. Si banne frères ki gagne ça l'occasion l'or-là surtout dans le mois de Ramadhan, alors c'est ene signe ki Allah Ta'ala pé oulé "Khair" (bien-être) de ça banne frères-là.

Quant à l'obstacle ki pé présenté ces derniers temps de la part ene groupe, c'est ene kitchose ki tout le temps fine ena et pou ena li tout le temps. Mais li bon conné aussi ki banne vaines tentatives semblable pou arrête le train de Da'wah ki pé roule avec toute so vitesse, li pas capave émane de la part banne ki Allah Ta'ala fine accorde zotte le vrai Noor-e-llm et la sagesse.

Dans ene l'époque à cote l'Oummah pé mort sans Imaan ou bien sans conne so Deen et pé faire face à banne problèmes graves à toute niveau lors plan national et international, ti bizin pli unir l'Oummah. Au lieu ça implante banne éléments divisionnistes couma "Khutbah en créole" pou brise l'unité de la communauté, li pas ene bon pas vers le progrès de l'Oummah. Similairement banne issue couma Wahdat-oul-Woujoud li pas ene sujet ki dimane être traité et surtout quand banne publiques et banne jeunes Da-ï zotte perna l'aptitude pou comprend ça ni zotte ena la bonne volonté pou comprend ça avec banne ki comprend ça.

Cependant nou remarqué ki ena banne Da-ï valable de tout bords ki nou considère zotte comme ene grand richesse pou l'Oummah ki l'Oummah pas bizin perdi. Zotte démarche pou crée l'entente parmi banne Da-ï, c'est ene démarche louable et appréciable. Insha-Allah avec démarche sincère de banne Da-i pareil, nou ena l'espoir avec Allah Ta'ala ki ça banne confusion et dissension ki fine ena dans l'horizon de Da'wah pou dissipé.

Bon courage à banne Da-ï ki pé sorti dans chemin Allah Ta'ala. Nou ti à content ki nou ti ene parmi zotte!

[Extrait de Al Jamiat Vol.1 No.14]