Tarawih - Questions & reponses

Question : Combien rakaats Tarawih éna ?

Réponse : Tarawih éna 20 rakaats. Selon ène hadith rapporté par Hazrat Abdoullah Bin Abbas ‎(Radiyallahou anhou‎)‎, Rassouloullah ‎(Sallallaahou A'laihi Wasallam)‎ ti pé faire 20 rakaats plus Witr dans le mois de Ramadwan. (Al-Bayhaqi/Mouswannaf Bin Abou Shaibah/Tibrani)

Question : Ena ki dire ki ça hadith-là li faible. C’est parceki éna ène Rawi (narrateur) nommé Ibraheem Bin Ousman dans so Sanad ki faible selon banne savants.

Réponse : Ou éna parfaitement raison ki le hadith li faible acoze présence Ibraheem Bin Ousman dans so Sanad. Mais ène l’autre principe ki dire ki ène hadith faible capave être considéré si so contenu li appuyé et supporté par la pratique de banne Sahaba-E-Kiraam et banne Tabeines. Le cas de ça hadith-là aussi li pareil. Li appuyé par la pratique de banne Sahaba-E-Kiraam. Hazrat Saa-ib Bin Yazeed fine dire :

“Zotte (banne Sahaba) ti pé faire 20 rakaats dans le mois de Ramadwan à l’époque Hazrat ‘Oumar ‎(Radiyallahou anhou‎)‎.” (Al Bayhaqi)

Hazrat Yazeed Bin Roumaan fine dire : “Banne dans l’époque Hazrat ‘Oumar ‎(Radiyallahou anhou‎)‎ ti pé faire accomplir 23 (20 Tarawih + 3 Witr) rakaats dans Ramadwan.” (Al Bayhaqi)

Hazrat Abou Abdour-Rahman As-Salami et Hazrat Aboul Hasanaa fine dire :

“Hazrat Ali ‎(Radiyallahou anhou‎)‎ ti ordonne ène personne pou faire banne dimounes accomplir cinq Tarweeha - c'est-à-dire 20 rakaats.” (Al Bayhaqi)

N.B Ene Tarweeha c’est 4 rakaats. 5 Tarweeha faire 20 rakaats.

“Hazrat Abdoullah Bin Mas’oud ‎(Radiyallahou anhou‎)‎ ti pé faire 20 rakaats et 3 rakaats Witr. (Oumdatoul-Qari - commentaire lors Boukhari par Allaamah Badrouddeen Al Ayni)

C’est à coze ki la pratique de banne Sahaba-E-Kiraam ti de 20 rakaats Tarawih, d’après le principe établi par banne savants de hadith, capave considère le hadith de Hazrat Abdoullah Bin Abbas ‎(Radiyallahou anhou‎)‎. Dans ène situation pareille ène hadith faible aussi renforci et vine fort.

Question : Eski li nécessaire faire Tarawih avec jama’at ?

Réponse : Rassouloullah ‎(Sallallaahou A'laihi Wasallam)‎ finne faire li avec jama’at pendant trois jours dans Ramadwan. Dans l’époque Rassouloullah ‎(Sallallaahou A'laihi Wasallam)‎ même, ène ti groupe de Sahaba-E-Kiraam ti pé faire li avec jama’at ène coté dans masjid ki Rassouloullah ‎(Sallallaahou A'laihi Wasallam)‎ finne approuvé. Dans l’époque Hazrat ‘Oumar ‎(Radiyallahou anhou‎)‎ aussi ti éna plusieurs groupes ki ti pé faire namaz Tarawih en plusieurs jama’ats ki plutard Hazrat ‘Oumar ‎(Radiyallahou anhou‎)‎ finne rassemblé zotte en ène seul jama’at derrière ène seul Imam. Hazrat Ousman ‎(Radiyallahou anhou‎)‎ et Hazrat Ali ‎(Radiyallahou anhou‎)‎ finne organise namaz Tarawih avec jama’at dans zotte règne respectif. Après zotte banne Tabeines aussi finne acomplir li avec jama’at. Tout sala suffit pou montré ki namaz Tarawih avec jama’at li Sounnat. Mais étant donné ki ti éna ène parti dans ça banne l’époque-là ki pas ti pé participé dans jama’at et ça pas finne désapprouvé par kiken, li faire nou comprend ki li ène Sounnat ki pas appliqué lors chaque individu.

Ene Sounnat pareil appelle Sounnat alal Kifaya. Donc Tarawih li Sounnat Mouakkadah lors chaque individu mais faire li avec jama’at li Sounnat alal Kifayah. C'est-à-dire dans chaque localité bizin éna ène groupe de personne ki accomplir li en jama’at dans masjid afin ki chaque individu dans ça localité-là li acquitté de so responsabilité. Sinon chaque individu pou responsable et coupable d’avoir néglige ène Sounnat.

Question : Eski Tarawih li Sounnat pou banne madames aussi ?

Réponse : Oui, Tarawih li Sounnat pou banne madames aussi.

Question :Eski gagne droit faire namaz tarawih derrière ene Hafiz sahab ki pas garde la barbe ou bien ene Hafiz sahab ki garde la barbe moins ki ene poignet?

Réponse : Faire ene fois Khatmoul-Qur’aan dans namaz tarawih li sounnat. Mais bizin faire li derrière ene Imam ou bien ene Hafiz sahab ki sérieux et bien dans Deen au moins par so l’apparence. Ene Hafiz sahab ki (a) pas garde la barbe et ki habitué rase so la barbe ou (b) ki habitué garde la barbe temporairement juste pou namaz tarawih dans Ramadwaan ou bien (c) ki garde la barbe moins ki ene poignet, li ene faasiq d’après Shariat. Pas gagne droit fixé ene hafiz pareil pou faire Imam ni dans faraz ni dans tarawih. La direction de masjid ki autorise ene Imam coumsa diboute lors Mouswallah, zotte pou coupable divant Allah Ta’ala pou avoir néglige zotte responsabilité. Ene hafiz pareil li pas gagne droit faire Imamat ni banne mouswalli gagne droit faire namaz derrière li. Vaut mieux faire tarawih avec banne tipti Sourah ki faire Khatmoul Qur’aan derrière ene Imam ou ene Hafiz pareil.

[Extrait de Al Jamiat Vol.1 No.14, Vol.3 No.8 et Vol.4 No.14]