Nage lors di sable

Mo garçon, Allah Ta'ala li grand. Divant grandeur Allah Ta'ala personne perna valeur. Faudré pas tappe l'estomac. C'est Allah Ta'ala li tout seul ki ena capacité faire ceki li oulé, quand li oulé et couma li oulé. Tout dans la main Allah Ta'ala. Narien pas trouve dans la main kikene. Quand to pou saisi ça point-là, to pas pou peur personne apart Allah Ta'ala. Tout ceki to pou faire, to pou faire li pou faire li même plaisir. Et quand ça pas plaire li, to pas pou faire li, même si to banne bien-aimés pou oulé to faire li. Eski ena kit plaisir plis ki ça plaisir ki ene dimoune gagné dans vive pou le plaisir Allah Ta'ala ? Ya-Allah ! Pena plaisir, pena désir divant ça plaisir-là !

O Allah ! Accorde nou tous ça volonté-là !

Mo garçon ! Quand to pou vive pou le plaisir Allah Ta'ala, to pou trouve ene seul kitchose. C'est la présence Allah Ta'ala. To pou vive pou li même et to pou mort pou li même. To pou satisfait ki to pé mort pou ene ki pas mort jamais. Si le monde pé mort pou ene cadavre ki mort, alors ki quantité mort to bizin mort pou ene Rabb ki pas mort. Quand to arrive dans ça stage-là, to pou trouve li même partout.

Ene hadice dire :

"Pense Allah, to pou trouve li divant toi."

Peut-être c'est ça même stage quand ene dimoune atteine, ki Rasouloullah ‎(Sallallaahou A'laihi Wasallam)‎ fine dire ki Allah Ta'ala vine so zoreille avec ki li tendé, li vine so lizié avec ki li guetté, li vine so la main avec ki li attrapé et li vine so li pied avec ki li marché. C'est ene stage très haute ki pas capave expliqué par banne mots. Bizin vive, bizin goute li et bizin passe là-dans pou conne li. Malheureusement ceki vive li, li pas capave expliqué. Si li expliqué aussi, dimoune pas comprend ou bien mal comprend. Au lieu accepté so manquement et so faiblesse, li trouve dimoune-là ki fou. Couma ça dimoune ki au lieu li saisi so défaut, li trouve la glace-là ki vilain. Donc c'est ene stage ki passe entre pas capave expliqué et critiqué.

Mo garçon! Guette to banne propre défauts avant ki to guette pou to camarade. Parceki ça li pli facile et pli profitable pou toi. Coumsa to capave corrige to banne manquements ki pou approche toi avec to Rabb. Ça pas pou empêche toi assume to devoir et to responsabilité corrige l'erreur to camarade. Au contraire to pou faire li pli bien parceki to pou corrige li sans ki to pou considère toi pli bon ki to camarade. Sinon to pou ena tendance insulté et dénigré to camarade. Quand to décide pou insulté, to blié ki to aussi to ena défaut. Oui, to pou blié ki to connaissance li résume dans apprane et conne traduction ene deux livres seulement. To pou considère ça ti de l'eau dans ki to pé nagé avec tant de fierté-là, couma ene l'océan sans rende compte ki c'est necque ene goûte narien ditout de ça l'océan ki to pencore trouvé et to pencore conné-là.

Mo garçon ! Ene ti conseille. Li dans to l'intérêt ki to nage lors di sable si fallait. Pas alle en dans. Sinon to pou noyé !

[Extrait de Al Jamiat Vol.1 No.15]