Ena ene limite…

Ena ene limite pou tout kitchose. Couma l’intelligence, imbécillité aussi ena ene limite. Et ça li paraite pli ridicule quand ça vine de coté ene ki prétende ki li ena connaissance. Ena des fois zotte déclare zotte tellement fort ki zotte pas bizin suive aukene Imaam. Zotte déclare zotte même tout. Couma parfois zotte senti zotte tellement faible ki zotte attrape tout feuillage ki zotte gagné pou sauve zotte la vie. Parfois ou reste calculé eski ene dimoune ki ena l’intelligence même ki pé cause coumsa ! Très souvent li dire ou et li pas hésité pou dire ki pas bizin suive Imaam. Mais ça même dimoune ose dire ou ki li pou prend ou responsabilité cote Allah. C'est-à-dire ou gagne droit suive li dans faire haraam vine halaal parceki li prend ou responsabilité. Li dire ou khutbah en créole correcte. Li pou prend responsabilité cote Allah. Li dire ou continué reste ek ou madame quand même ou fine fini donne li so tous les trois talaaq parceki li pou prend ou responsabilité cote Allah.

Eski ou pé trouvé ki pé arrivé-là ? Li empêche ou suive Imaam Abou Hanifah (rahmatoullahi ‘alayh) ou ene l’autre Imaam parceki d’après li, ça pas gagne droit. Mais l’autre coté ou gagne droit faire haraam vine halaal lors so confiance.

Mo frère ! Eski to conné ki to pé dire ? To pé faire campagne pou dimoune arrête suive interprétation, explication, éclaircissement et l’opinion banne grands grands Imaam ki fine vive dans ene l’époque bien près avec l’époque Rassouloullah ‎(Sallallaahou A'laihi Wasallam)‎ pou zotte suive toi lors to garanti et to confiance ! To perna parole. To perna principe. Mo dimane moi, dans to bateau couma la peau pistache-là, kisanla kisanla to pou charrié dans ça tempête ki pou ena jour Qiyaamat-là ?

To pas oulé tanne dire bizin suive Imaam mais to invite dimoune suive toi lors to confiance. Assez mo frère assez ! Tout kitchose ena ene limite.   

[Extrait de Al Jamiat Vol.2 No.1]