L’amour pou Rassouloullah ‎(Sallallaahou A'laihi Wasallam)‎

Hadice

“Dimoune pli proche avec moi jour Qiyaamat pou ene dimoune ki fine envoye pli boucou Daroud lors moi.” (Tirmizi)

L’amour pou Rassouloullah ‎(Sallallaahou A'laihi Wasallam)‎

Ene musulman ! Et après ça li perna l’amour pou Rassouloullah ‎(Sallallaahou A'laihi Wasallam)‎!! C’est ene kitchose impossible ! Tout musulman bizin ena l’amour pou Rassouloullah ‎(Sallallaahou A'laihi Wasallam) pou être ene musulman. Mais ena ki ena li ene tigite couma ena ki ena li bien boucou même.

Dimoune ki ena li ene tigite, li ena pratique et sunnat de Rassouloullah ‎(Sallallaahou A'laihi Wasallam)‎ aussi ene tigite même dans li. Li pou dire ki li content Rassouloullah ‎(Sallallaahou A'laihi Wasallam)‎ mais quand ou guette li, ou même ou pou étonné ki perna narien dans li ki ressemblé à Rassouloullah ‎(Sallallaahou A'laihi Wasallam)‎. Apart li porte ene nom impé musulman, ki peut être à coze ene acteur ti appelle ça nom-là, so famille fine content pou mette ça nom-là avec li, perna narien visible lors li ki indiqué ki li ene musulman.

Rassouloullah ‎(Sallallaahou A'laihi Wasallam)‎ fine ordonne pou garde la barbe mais sanla pas trouve aukene nécessité pou garde li. Pas conné ki li gagné dans dechicotte so visage tous les matins. Nou bizin reconnaite ki ena boucou ki zotte très sincère malgré ki zotte pas réussi garde la barbe. Zotte reconnaite zotte l’erreur. Zotte ena le regret et le chagrin ki zotte perna la volonté ou bien l’occasion ou bien la chance observe ça sounnat-là. Mais ceki pli malheureux ki ena boucou ki pas seulement pas garde li, zotte ena l’audace critique et bouffonne banne ki mette ça grand sounnat-là en pratique. Avec boucou hésitation, mais bizin dire li ki sanne catégorie-là so Imaan et so l’amour pou Rassouloullah ‎(Sallallaahou A'laihi Wasallam)‎ li bien bien faible.

Coumsa même Rassouloullah ‎(Sallallaahou A'laihi Wasallam)‎ fine montré so dégoût pou ene ki so “Izaar” ou so pantalon, li dépasse so cheville. Ena fermé là-dans ! Oui, ça kitchose-là li bien grave malgré ki très souvent nou faire l’erreur sous-estime so gravité. Mais musulman-là li pas prend ça compte. Pou fini avec ou, facilement li capave dire ou ki Allah pas guette ou l’habillement. Couma dire l’habillement fine reste necque pou alle fréquenté, alle dans fiançailles, alle dans mariage ou bien alle casse pause par-ci par là. Faudré pas pense coumsa. Li bizin important même pou Rassouloullah ‎(Sallallaahou A'laihi Wasallam)‎ fine trouve la nécessité donne directive concernant ça. Quand ene dimoune so l’amour pou Rassouloullah ‎(Sallallaahou A'laihi Wasallam)‎ li faible, li pas arrivé trouve l’importance suive Rassouloullah ‎(Sallallaahou A'laihi Wasallam)‎ so sounnat. Li contente li avec ene de pratiques saisonnière ou déclarations verbales dans le but pou exprime so l’amour et l’amitié pou Rassouloullah ‎(Sallallaahou A'laihi Wasallam)‎. Mais ça, li pas suffit parceki Rassouloullah ‎(Sallallaahou A'laihi Wasallam)‎ fine dire :
“… Celui ki content mo sounnat, alors c’est li même ki content moi…”
C'est-à-dire l’amour pou Rassouloullah ‎(Sallallaahou A'laihi Wasallam)‎ li trouve dans content et suive so sounnat. Ena ene causé ki dire :

• Camarade so camarade li ene camarade.
• Camarade ene l’ennemi li ene l’ennemi.

Lors ça même base nou dire ki Rassouloullah ‎(Sallallaahou A'laihi Wasallam)‎ so camarade li ene camarade. Par contre Rassouloullah ‎(Sallallaahou A'laihi Wasallam)‎ so l’ennemi li ene l’ennemi.

Astere ça banne la mode, l’habillement, la coupe et tenue ki nou fine copié, eski ça li banne kitchose ki camarade Rassouloullah ‎(Sallallaahou A'laihi Wasallam)‎ fine invente ça ou bien so l’ennemi ? Définitivement li pas so camarade. Alors coumaniere nou permette nou suive principe et la mode l’ennemi de Rassouloullah ‎(Sallallaahou A'laihi Wasallam)‎ et après ça nou tappe l’estomac et nou dire ki nou content Rassouloullah ‎(Sallallaahou A'laihi Wasallam)‎. Sans doute ça pas pou faire Rassouloullah ‎(Sallallaahou A'laihi Wasallam)‎ plaisir. Dans ene façon nou pé blesse sentiment Rassouloullah ‎(Sallallaahou A'laihi Wasallam)‎ ki ene bon musulman pas capave permette li faire ça. Quant à ene ki ena boucou l’amour pou Rassouloullah ‎(Sallallaahou A'laihi Wasallam)‎, li suive Rassouloullah ‎(Sallallaahou A'laihi Wasallam)‎ dans so conception, dans so Ibaadat, dans so banne transactions, dans la vie sociale et conjugale, dans so caractère, so comportement et dans tout les domaines de so la vie en général et à chaque instant et tout les jours. Quand ene dimoune arrive dans ene stage pareille, astere chaque instant, chaque moment et tout les jours Eid Milaad-un-Nabi même pou li. C’est ça même ki vrai l’amour pou Rassouloullah ‎(Sallallaahou A'laihi Wasallam)‎ et ça même le Tareeqah (principe) de banne Sahaba-e-Kiraam, banne Tabeïnes, banne Taba-Tabeïnes et tous banne personnages pieux en général. Sinon cause l’amour Rassouloullah ‎(Sallallaahou A'laihi Wasallam)‎ occasionnellement sans adopté le principe de Rassouloullah ‎(Sallallaahou A'laihi Wasallam)‎ dans la vie li couma dire ça garçon ki maltraite so mama pendant 364 jours et dans ene seul jour à l’occasion fête mama li donne li ene joli cadeau. Tout dimoune ki ena l’intelligence, pas pou apprecié ça qualité l’amitié là. Li paraite pli couma hypocrisie ki l’amour ou l’amitié. Par Allah, Nou Nabi ‎(Sallallaahou A'laihi Wasallam)‎ li mérite ki nou content li plis ki tout kitchose ! Plis ki nou même ! Plis ki nou la vie !

اَللّهُمَّ ارْزُقْنَا حُبَّ نَبِيِّك وَمُرَافَقَتَهُ فِى الْجَنَّة

“O Allah! Accorde nou vrai l’amour de to Nabi ‎(Sallallaahou A'laihi Wasallam)‎ et accorde nou tous so compagnie dans jannat! Ameen !”

• Hazrat ‘Ali ‎(Radiyallahou anhou‎)‎ :- « Rassouloullah ‎(Sallallaahou A'laihi Wasallam)‎ ti cher à nou plis ki nou dibien, nou z’enfants, nou mama papa et de l’eau frais dans ene moment de la soif. »
• Hazrat ‘Amr Bin ‘Aas ‎(Radiyallahou anhou‎)‎ :- « Pa ti ena narien pli cher à nou ki Rassouloullah ‎(Sallallaahou A'laihi Wasallam)‎. »
• Hazrat Khubaïb ‎(Radiyallahou anhou‎)‎ :- « Mo préfère donne mo la vie ki ene piquant pique dans li pied Rassouloullah ‎(Sallallaahou A'laihi Wasallam)‎. »
• Hazrat Abou Soufyaan ‎(Radiyallahou anhou‎)‎ :- « Mo pas fine trouve dimoune content kikene couma banne Sahaaba ti content Rassouloullah ‎(Sallallaahou A'laihi Wasallam)‎. »

[Extrait de Al Jamiat Vol.2 No.1]