Ene l’exemple (Khoutbah en creole)

Nou conné ceki ena dans pure du lait vache, perna dans du lait en poudre. Mais malgré ça, nou banne zenfants fine habitué et adapté plis avec du lait en poudre ki avec du lait vache. Ena des fois zotte même ziska lève néné pou boire du lait vache. Astere si amene du lait vache dans la caze, ena ki pou boire li couma ena ki pas pou oulé li. Ça pou crée bouleversement dans la caze. Ene papa ou ene responsable de la maison pou préfère amene du lait en poudre ki tous dimoune capave boire sans cause aukene problème. Si jamais li insisté pou faire zotte boire du lait vache, ça veut dire ki li pas ene bon responsable ki oulé du bien so famille. Par cela li pé nuire l’harmonie familiale. Par ça l’exemple-là nou apprane ki vaut mieux ene kitchose correcte ki amene l’harmonie dans place ene l’autre pli bon ki crée dissension et désaccord.

Ça principe-là nou fine apprane ça avec l’attitude ki Rasouloullah ‎(Sallallaahou A'laihi Wasallam)‎ ti adopté concernant la rénovation ou la reconstruction de Ka’abah Shareef d’après plan Hazrat Ibraheem ‎(Alaihis Salaam)‎‎ pou couvert ça boute ki appelle Hateem et barre li avec muraille. Et normalement le Ka’abah ki ti d’après plan Hazrat Ibraheem ‎(Alaihis Salaam)‎‎ ti pli bon. Mais Rasouloullah ‎(Sallallaahou A'laihi Wasallam)‎ fine abandonne ça l’idée-là ziste pou pas crée confusion dans l’esprit dimoune. Si ça li applique pou ene kitchose ki pli bon, alors ki quantité pli bien li pou appliqué pou ene kitchose ki pas bon ?

Astere à la lumière ça principe-là, laisse nou guette le problème faire Khutbah Jum’ah en créole. N’importe ki sanla ou dimandé si faire Khutbah  Jum’ah en arabe li permette ou bien non ? Ou pas pou gagne personne ki pou dire ou ki li pas permette. Tous d’accord ki li permette. Dans l’époque hajj, ena pli boucou dimoune ki pas conne arabe ki banne ki conné. Là aussi dans Makkah et dans Madinah zotte faire Khutbah en arabe même. D’après tous les 4 mazhabs, bizin faire Khutbah Jum’ah en arabe même. Malgré tous ça-là si nou faire li en créole, alors ki but capave ena encore derrière ça apart crée division dans la communauté.

Si jamais faire Khutbah Jum’ah en créole ti permette et pli bon, là-aussi, ziste pou garde l’harmonie, ene personne souciant et responsable ti pou préfère laisse li être pratiqué en arabe même, ki tous dimoune d’accord. Mais quand nou conné ki li pas permette même faire li en créole, ki nou pé attane dans persisté faire li ? Capave ena kit raison ou kit but derrière ça, mais définitivement li pas ene du bien pou la communauté et en faisant cela nou pas pé montré nou bonne foi. Nou, comme banne Da-ï, nou bizin calculé ki pou arrive nou dans nou Qabar si la communauté subir après nou, banne conséquences grave causé par décisions irresponsable ki nou fine capave prend dans nou vivant !

[Extrait de Al Jamiat Vol.2 No.2]