L’importance de nourriture halaal

Creation insaan

Allah Ta’ala fine donne l’existence à insaan a travers ene le corps et ene rouh (âme). Là-dans ceki pli important c’est so rouh parceki ene le corps sans ene rouh li pou seulement ene cadavre malgré ki li capave bien joli, robuste et bien battu.

Allah Ta’ala pé dire:

“Certainement celui ki fine purifié so nafs, li fine gagne reussite.” (91:9)

Rasouloullah ‎(Sallallaahou A'laihi Wasallam)‎ fine dire:

“… Certainement ena ene morceau dans le corps. Si li correct, entier le corps pou correct et si li contaminé,  entier le corps pou contaminé. Certainement ça morceau-là c’est le coeur.” (Boukhari)

Mais ça le corps-là aussi ena so l’importance parceki ene rouh pas capave existé sans ene le corps. Bizin ena ene le corps ki ça rouh-là capave existé.

Pou ki ça le corps-là reste en forme et en bonne santé, Allah fine mette certaine nécessité ki ça le corps-là bizin tel que manger, boire, linge, etc… Et pou nou capave satisfaire à ça banne nécessité-là, nou pou bizin travail et faire zeffort. C’est le système ki Allah ta’ala fine etabli dans ça le monde-là.

Revenue bizin halaal

Mais pou nou gagne ça l’argent-là, nou bizin choisir ene moyen halaal ki l’Islam fine préconisé. Faudré pas ki li vine de ene source haraam.

Allah Ta’ala pé dire:

“O banne messagers! Mange banne kitchose ki pure (halaal) et faire banne bon actions. Certainement mo conné ceki zotte faire.” (S23:V51)

Ça verset-là montré ki si ene personne consomme nourriture halaal, so banne actions aussi pou sorti bon parceki Allah ta’ala fine mentionne bon action tout de suite après nourriture halaal. Ene l’exemple claire c’est ki quand ene carburant (l’essence, mazoute etc …) dans ene machine li correct, li pure et perna mélange et saleté, so rendement aussi li correct et machine là marche bien. Et si ena mélange et saleté, non seulement machine pas pou marche bien, mais li capave aussi provoque accident.

En d’autres mots, si nourriture pou halaal, banne actions pou sorti correct, pou ena l'envie pou faire bon action, pou ena noor dans le coeur et pou ena degout pou banne gounaah. Et de l’autre coté si nourriture pas halaal, pou ena tendance pou faire mauvais action, pas pou ena noor dans le coeur et pou ena ene desinteressement et degout pou banne bon actions. Apart ça ene dimoune coumsa li vine ene fardeau et nuisance pou la societé.

[Extrait de Al Jamiat Vol.2 No.2]