La jalousie

La jalousie c’est ça brûlure ki ene dimoune senti dans so le cœur quand li trouve so prochain dans bien. Ene personne li senti ça quand li trouve so collègue dans travail gagne promotion. Ene voisin li senti ça quand li trouve so voisin pé arrivé. Ene dimoune ki ou considère li ene ou bon camarade aussi capave senti ça quand li trouve ou dans bien.  Ziska ene Aalim aussi li capave éprouve ça sentiment-là quand li trouve ene l’autre Aalim pé gagne la popularité dans publique.

Donc c’est ene kitchose ki trouve dans nature presque tous dimoune. Mais ena dimoune ki garde li dans contrôle couma ena ki emporté par ça. Shariah dimane nou pou garde li dans contrôle et pas emporté par ça. Dimoune ki garde li sous contrôle, li perna aukene blâme lors li. Au contraire li ene Moujahid (combattant) ki pé combatte so nafs. Acoze ça li ena ene grand récompense cote Allah Ta’ala.

Dimoune ki emporté par ça et li sorti en dehors contrôle, li ena tendance faire so prochain du tort. Si li trouve li incapable, au moins li souhaite malheur so prochain ki li éprouve jalousie pou li. Tout ça là li haraam. Ene dimoune ki faire ça, li abaisse li même. Li ranne so la vie même difficile. Et finalement li pas capave avance narien parceki ceki Allah Ta’ala fine écrire dans destin, ça pas capave barré. Alors li inutile pou tombe dans ene bassesse pareille.

Quand la jalousie li ene mauvais kitchose, ça veut dire ki bizin débarrassé avec ça. Et li possible pou débarrassé avec ça mais bizin ene ti pé la volonté. Ene dimoune bizin calculé ki tout bienfait ki n’importe ki sanla fine gagné, c’est Allah Ta’ala ki fine accorde li ça. Astere si ça dimoune-là souhaite ki un tel pas ti bizin gagne ça faveur ki li fine gagné-là, ça li représente ene objection à l’égard la partage Allah Ta’ala. Et normalement ça li ene kitchose bien grave. Et ene dimoune faire li même du tort avec ça.

[Extrait de Al Jamiat Vol.2 No.5]