Haiz

Q : Ki veut dire haiz ?

R : Haiz c’est ene saignement ki ene jeune fille ou ene madame expériencé en principe chaque mois.

Q : Combien jours ene madame capave gagne haiz ?

R : Tous madame pas pareille. Ena ki gagne li boucou même couma ena ki gagne li bien tigite jours. Ça li varié de 3 à 10 jours. C'est-à-dire pli tigite jours ki ene madame capave gagne so haiz c’est 3 jours et pli boucou c’est 10 jours.

Q : Ki position ene madame ki fine gagne saignement ene ou deux jours seulement ?

R : Si ene madame fine gagne saignement ene ou deux jours et avant trois jours même li fine arrête saigné, dans ça cas-là bizin guetté si li fine arrête saigné juska 15 ou plis ki 15 jours, alors ça saignement ki li fine expériencé pendant ene ou deux jours-là, li pas haiz. Pou ene saignement li compte couma haiz, faudré ki ça continué pendant ene délai minimum de trois jours.

Q : Ki position ene madame ki so saignement fine dépasse 10 jours ?

R : Si li ene personne ki la première fois li pé gagne haiz, alors li tire 10 jours pou so haiz et le reste pou compte couma istihaaza. Istihaaza li couma ene saignement de maladie ki pas empêche garde roza, lire namaz et ni ça empêche faire Tilaawat Qour’aan.

Si li ene madame ki li ena ene nombre de jours ki li habitué gagne so haiz, alors le nombre de jours ki li habitué gagne so haiz pou compte couma haiz. Et banne jours en plis pou compte couma istihaaza. Par exemple ene madame ti habitué gagne so haiz 6 jours et dans ene certaine mois so saignement fine continué juska 11 jours. Dans ce cas là, ça 6 jours ki li habitué gagné pou compte couma haiz et ça cinq jours en plis ki li fine gagné-là pou vine istihaaza.

Durée minimale et maximale de haiz

Hazrat ‘Abdoullah Bin Mas’oud ‎(Radiyallahou anhou‎)‎ dire :

“ (Durée de) haiz li de 3 jours, 4 jours, 5 jours, 6 jours, 7 jours, 8 jours, 9 jours et de 10 jours. Si li dépassé, alors madame-là vine ene madame en état istihaaz.” (Sounan Darqoutni)

Note : Ene saignement ki arrêté avant trois jours et li pas reprend avant 15 jours appelle li istihaaza. Ene madame ki gagne ça qualité saignement-là appelle li Moustahaaza.

Hazrat ‘Ousmaan Bin Aboul ‘Aas ‎(Radiyallahou anhou‎)‎ dire :

“Ene madame ki en état de haiz, (so saignement) li dépasse 10, alors ça madame-là li moustahaaza.”

N.B : Selon Al-Baihaqui, le sanad de ça hadice-là li ene sanad passable.

Hazrat Anas ‎(Radiyallahou anhou‎)‎ dire:

“La durée minimale de haiz li de 3 jours.” (Sounan Ad-Darimi)

Selon ene hadice de Darqoutni, Hazrat Anas ‎(Radiyallahou anhou‎)‎ dire :

“La durée minimale de haiz li de 3 jours et la durée maximale li de 10 jours.” (Sounan Ad-Darimi)

N.B : Selon différent hadice ki fine rapporté de différent Sahaba-e-Kiraam ki la durée minimale de haiz c’est 3 jours et la durée maximale li de 10 jours. Li vrai ki le sanad de chaque hadice ena ene certaine défection mais li ene principe établi chez banne savants de hadice ki ene hadice rapporté par plusieurs hadice faible, vine dans so l’ensemble dans rang et en capacité ene hadice fort et solide ki capave être appliqué.

[Extrait de Al Jamiat Vol.2 No.5]