Vivant dans qabar

Nou bien-aimé Nabi ‎(Sallallaahou A'laihi Wasallam)‎ li vivant dans so qabar. Hazrat Anas ‎(Radiyallahou anhou‎)‎ fine rapporté ki Rasouloullah ‎(Sallallaahou A'laihi Wasallam)‎ fine dire :

“Banne Prophètes zotte vivant dans zotte qabar …”

C’est ene hadice ki fine rapporté par Al-Baihaqui, Allaamah As-Subki et Abu Ya’la. Et c’est ene hadice authentique.

Quand kikene faire salaam lors qabar Rasouloullah ‎(Sallallaahou A'laihi Wasallam)‎, li tanne so salaam. Et quand kikene faire salaam depi loin, alors banne anges transmette ça à Rasouloullah ‎(Sallallaahou A'laihi Wasallam)‎. Selon ene hadice dans Mousnad Ahmad et Al-Moustadrak, Rasouloullah ‎(Sallallaahou A'laihi Wasallam)‎ fine dire :

“… Issa, garçon Mariam pou vine cote mo qabar et pou faire moi salaam ki sans doute mo reponne li.”

Ça hadice-là aussi li ene hadice solide et authentique. Reste vivant dans qabar, li pas ene zaffaire ki impossible parceki ça Créateur ki faire poisson vive dans de l’eau et dimoune vive lors la terre, li ena la capacité garde so banne serviteurs privilégiés - banne Prophètes, vivant enbas la terre dans zotte qabar. Narien pas impossible ni difficile pou Allah Ta’ala.

[Extrait de Al Jamiat Vol.2 No.6]