Pli facile et pli efficace

Ou dans ene problème. Ou oulé résoudre ça problème-là. Ou guette sanla ou guette l’autre-là. Personne pas disposé aide ou. Ou téléphone ene dimoune ki ou conné. Ou pas gagne li lors téléphone. Parfois li dans la caze même mais li faire dire ki li pas là ou bien li occupé. Et si li reponne ou aussi, li pas disposé résoudre ou problème parceki li senti li incapable ou bien li pas envie. Si li ena la volonté, capave li perna le moyen. Ene tas problèmes ziste pou résoudre ene seul problème. Si necque ou ti faire 2 rakaat namaz et après ça ou talle ou la main avec ou Rabb, ou problème ti à fini résoudre.

Eski li pas pli facile et pli efficace ?

Ou ti à content vine bien proche avec ene ki ena bonne réputation ou bien ene ki ena l’influence ou bien l’autorité. Ou ti à même content si ou ti capave vine très proche avec ene ministre, prince ou le roi. Quand même ou capave pas gagne aucaine bénéfice avec zotte mais li ene grand plaisir pou dire dimoune ki ou très proche avec tel ou tel personnage. Mais vine dans l’entourage ça banne personnalités-là si li pas impossible, li vraiment difficile. Mais ki faire bizin chagrin quand ou capave vine proche avec ene ki perna so deuxième ? Perna gardien divant so la porte ! Perna l’heure ki ou pas capave joine li ! Perna saison, perna climat ki ou pas capave contacté li ! C’est Allah Ta’ala ki disponible à toute l’heure et partout !!!

Necque ena pou suive le Guide Universel, Hazrat Mouhammad ‎(Sallallaahou A'laihi Wasallam)‎ et voilà ou pou trouve ou bien bien près avec celui ki perna narien couma Li.

Eski li pas pli facile et pli efficace ?

[Extrait de Al Jamiat Vol.2 No.6]