Beauté de l’Islam

Nou bizin guette beauté de l’Islam dans so globalité et so l'ensemble. Si nou guette so banne la loi séparément, nou pas pou trouve li. Au contraire ça pou induire nou dans l’erreur ki pou faire nou mal juge l’Islam.

Si nou oulé guette ene visage so beauté, nou bizin guette li dans so l’ensemble. Si nou tire lizié ene coté ou bien nez-nez ene coté pou admire li, jamais nou pou capave admire ça. Nou bizin guette ça lizié-là ou bien ça nez-nez là dans so "set-up" pou capave trouve so vrai beauté. Coumsa même si nou casse casse l’Islam, nou pas pou capave admire li. Nou bizin guette li dans so l’ensemble. Donc li ene erreur capital mette en question certaine issue dans l’Islam sans analyse li dans so l’ensemble et dans so globalité. Par exemple ena capave trouve coupe la main voleur ou lapidation ene personne marié ki fine commette adultère couma ene sanction très sévère. Mais quand nou guette li dans so l’ensemble, nou pou trouve li ajusté bien et tout à fait correct.

Erreur de banne prédicateurs

Très souvent banne prédicateurs ki pas convaincu de beauté de l’Islam, faire erreur capital dans essaye pou cachiette certaines issues de l’Islam. Parfois ça amene zotte pou refuse accepté l’existence même de ene tel issue dans l’Islam couma parfois zotte essaye pou donne banne justifications banales. Faudré pas banne prédicateurs senti zotte complexé parceki ça li ene kitchose ki Allah Ta’ala fine révélé. Ceki Allah Ta’ala, le Créateur Suprême fine révélé, li bizin bon à 100 pou 100. Quant à banne ‘Oulama ki fine apprane Deen avec banne Ustaad (professeurs) ki Mouttaqui et Deendaar, zotte pas gagne ça problème-là. C’est necque islamologie de banne islamologues ki pas fine gagne l’occasion apprane Deen par reste dans compagnie banne Ustaad Deendaar, ki faire face à ça problème de complexe-là devant zotte homologue kaafir. Dans zotte complexe, très souvent zotte arrivé cachiette le vrai visage de l’Islam ki peut-être dans certaine circonstance, ti capave vine ene moyen pou donne lezot hidayat (guidance).

Banne musulmans zotte bizin satisfait avec ça mode de vie ki l’Islam fine présenté-là. Et zotte bizin ena Yaqeen (conviction) ferme ki li correcte à 100 pou 100 et la réussite totale li trouve uniquement là-dans même. Nou pas pou capave convaincre lezot tanque ki nou même, nou pas convaincu. C’est par nou conviction ki lezot aussi pou convaincu.

Compromis

Dimoune ki pas convaincu de zotte position ki ena tendance faire compromis avec lezot sous fausse prétexte de la tolérance. Banne Moushrik et banne kaafir ti faire ene requête avec Rassouloullah ‎(Sallallaahou A'laihi Wasallam)‎ ki chakene accepté ene parti dans religion so camarade. Mais Rassouloullah ‎(Sallallaahou A'laihi Wasallam)‎ fine rejette ça l’idée-là catégoriquement. Le sourah Al-Kaafiroune expose ça l’attitude-là dans ene façon claire et explicite. C’est ene l’attitude ki chaque musulman, ki Imaan pé vibré dans so le cœur, bizin adopté.

Le Sahabi Abdullah Bin Salaam ‎(Radiyallahou anhou‎)‎ ki ti ene juif auparavant, ti oulé continué certaines pratiques ki li ti pé pratiqué auparavant. Par exemple li ti pé continué montré respect pou le jour de Sabah (Samedi) ki li ene grand jour pou banne juifs couma jour de Jum’ah li ene grand jour pou banne musulmans. D’ailleurs pas ti ena aukene preuve dans shariah ki ti empêche montré respect pou ça jour-là. Mais Allah Ta’ala pas fine content et fine révèle le verset 208 dans sourah Al-Baqarah ki dire :

“O banne ki fine amene Imaan, rentré entièrement dans l’Islam et pas suive le pas de Shaitaan parceki li ene l’ennemi au clair pou zotte.”

Ça verset-là et le sourah Al-Kaafiroune li ferme la porte de tous compromis ki empêche ene personne reste ene musulman complète. Et faire en sorte ki ou pratique ene ti pé depi dans ou Deen et ene ti pé depi dans ou camarade so Deen, c’est ene façon pou suive shaitaan. A la longue, ça capave amene vers amalgame de banne religions en ene seul religion pou corresponne avec le fameux slogan “Ene sel lepep ene sel nation”. Li capave paraite joli mais li pas islamique et adopté ene l’attitude pareil c’est ene façon pou démolir ceki Rassouloullah ‎(Sallallaahou A'laihi Wasallam)‎, banne Sahaba-e-Kiraam, banne Tabeines, banne Taba-Tabeines et l’Oummah fine bâtir avec tant de sacrifices.

Encourageant mais pas suffisant

Mo conné si avant ou ti pé marche lors la rue avec ou le corps presque découvert et astere-là quand même ou pas coumsa et ou pé couvert ou la tête, ça li très très encourageant, surtout si ou fine ena le courage et la volonté pou faire li dans ene pays non-islamique. En même temps li bon ou conné ki ça quantité-là li encourageant mais pas suffisant. Ki Allah Ta’ala donne ou le courage pou poursuivre ou zeffort dans le but pou ranne li suffisant et satisfaisant.

Ene bon musulman

Li vrai ki porte ene chemisier et ene pantalon pas empêche ou être ene musulman mais ou bizin conné ki ça empêche ou être ene BON MUSULMAN ! Coumsa même commette l’adultère, coquin, cause menti etc. pas empêche ene personne être ene musulman mais nou tous conné ki avec ça banne actes indésirables-là, li pas capave vine ene BON MUSULMAN. 

Ou désir ena ene pli bon la caze, ene pli joli l'auto, ene pli bon travail et ene pli joli partenaire. C'est tout à fait naturel et légitime mais ki faire ou pas désir ena ene pli bon Imaan pou être ene pli bon musulman?

[Extrait de Al Jamiat Vol.2 No.9]