Habeebullah (le bien-aimé d'Allah)

Nou Nabi Hazrat Mouhammad ‎(Sallallaahou A'laihi Wasallam)‎ li Allah Ta'ala so bien-aimé. Acoze ça nou appelle li Habeebullah aussi. Quand li le bien-aimé Allah Ta'ala, alors li bizin le bien-aimé de tous musulmans aussi. Donc nou Nabi ‎(Sallallaahou A'laihi Wasallam)‎ li nou Habeeb (bien-aimé). Si nou fine gagne le droit, le privilège et l'honneur appelle Nabi ‎(Sallallaahou A'laihi Wasallam)‎ nou Habeeb, c'est ene grand cadeau de coté Allah Ta'ala. Par ça, Allah Ta'ala fine donne nou prestige. Donc gagne l'amitié pou Rassouloulah ‎(Sallallaahou A'laihi Wasallam)‎ li ranne nou valeureux et prestigieux.

Le prestige ki Allah Ta'ala fine accorde nou par donne nou l'amitié de so Rasool ‎(Sallallaahou A'laihi Wasallam)‎, li pli augmenté quand nou manifesté li dans nou la vie de tous les jours. Nou manifesté ça l’amitié-là par reste dans l'obéissance Allah Ta'ala d'après sounnat et principe Rassouloullah ‎(Sallallaahou A'laihi Wasallam)‎. Quand nou suive Rassouloullah ‎(Sallallaahou A'laihi Wasallam)‎ dans ibaadat, dans manière, dans mangé, boire, dormi, dans habillé et dans tous nou activité, c'est dans ça façon-là ki nou manifesté nou l'amitié pou Rassouloullah ‎(Sallallaahou A'laihi Wasallam)‎. Li bien drôle et étrange pou accepté Rassouloullah ‎(Sallallaahou A'laihi Wasallam)‎ comme nou Habeeb quand nou pas montré nou admiration pou so banne sounnat. Si nou ti admire so sounnat, nou pas ti pou capave reste sans pratique li dans nou la vie. Et si nou pé suive banne acteurs, banne actrices, banne footballeurs, banne danseurs et banne chanteurs dans nou mode de vie, ça montré ki nou ena appréciation et admiration pou zotte. En présence ene telle mode de vie, nou montré ki nou Habeeb c’est ça banne faasiq (dimoune en dehors cadre) là. C’est ene zouloum et l’injustice à l’égard Rassouloullah ‎(Sallallaahou A'laihi Wasallam)‎. Ene kitchose ki ti bizin donne li, nou fine donne ça tous banne faasiq. Lezot-là pé faire même zouloum avec Rassouloullah ‎(Sallallaahou A'laihi Wasallam)‎ par pas reconnaite so valeur. Nou aussi nou pas moins ki banne-là dans faire zouloum. Si guette bien nou même pli grand zaalim (injuste) parceki nou pretanne content li mais nou suive lezot.

Dans suive Rassouloullah ‎(Sallallaahou A'laihi Wasallam)‎, nou suive pli grand personnage ki fine capave existé lors la terre parceki perna narien ki pli cher à Allah Ta'ala dans toute la création ki Rassouloullah ‎(Sallallaahou A'laihi Wasallam)‎. Donc suive Rassouloullah ‎(Sallallaahou A'laihi Wasallam)‎ c'est suive pli grand la mode et le principe pli noble. C’est dans suive ça la mode-là ki l’humanité capave gagne so vrai dignité.

[Extrait de Al Jamiat Vol.2 No.10]