Coquin titre

Tout le temps ti tanne dire coquin du bien, coquin marchandise, coquin bijou, coquin casse etc. Mais astere pé tanne dire dimoune pé coquin titre aussi parceki zordi jour ena dimoune pé rode rasse titre Tabei avec Imam Abou Hanifah rahmatoullahi ‘alayh. Pourtant selon ene bon nombre de banne savants de hadice, Imam Abou Hanifah rahmatoullahi ‘alayh fine gagne l’honneur trouve le Sahabi Hazrat Anas ‎(Radiyallahou anhou‎)‎. Ena fine même dire ki li fine rapporte hadice avec certaine Sahabi. Pou ene musulman vine ene Tabei li sufi ki, en état de Iman, li trouve ene Sahabi. Tout ça-là montré ki Imam Abou Hanifah rahmatoullahi ‘alayh li ene Tabei. Quand Allah Ta’ala donne kikene ene titre, ki faire bizin faire la tête lipied pou rasse ça l’honneur-là avec li ? Celui ki tente pou faire ene travail pareil, li pou faire li même du tort parceki la vérité pou reste la vérité. Donc Imam Abou Hanifah rahmatoullahi ‘alayh pou continué reste ene Tabei malgré tous banne zefforts de la part de banne irresponsables.

[Extrait de Al Jamiat Vol.2 No.10]