Sonne pétard

Sonne pétard li pas travail ene bon musulman. Parceki ene bon musulman c'est ene personne ki amene so la vie d'après commandement Allah Ta'ala. Sonne pétard li ene façon pou casse l'ordre Allah Ta'ala. Quand ene dimoune li casse l'ordre Allah Ta'ala li pas reste ene bon musulman.

Sonne pétard li ene gaspillage. Ene dimoune ki faire gaspillage, Allah Ta'ala appelle li frère de shaitaan. Par sonne pétard ene dimoune li rallié li avec shaitaan. Celui ki rallié li avec shaitan li éloigne li avec Allah Ta'ala. Pena kitchose pli mauvais ki ene dimoune li éloigné avec Allah Ta'ala.

Par sonne pétard ene dimoune li fatigue so prochain et indispose banne ki déjà dans la peine. Ça empêche banne dimoune reposé. Ene dimoune ki fatigue so prochain li vine ene zaalim. Ene zaalim li expose li à la colère divine. Eski ena ene la vie pli misérable ki vive dans la colère divine?

D'après sens ene hadice, Rassouloullah ‎(Sallallaahou A'laihi Wasallam)‎ fine dire ki ene véritable musulman c'est celui ki pas faire banne musulmans du tort. Par sonne pétard ene personne li disqualifié d'être ene véritable musulman. Parceki ça li dérange banne frères et soeurs couma li.

Pena aukene utilité dans sonne pétard apart nuire la vie dimoune et brûle ou la monnaie ki ou capave fine gagne li avec tant de sacrifice. Ki conné avec ça ene ti casse ki ou pé teigne la flamme de ou désir injustifié, ou ti capave soulage kikene dans so souffrance. Sans doute ou frère et ou soeur ki dans la peine, li pli mérite ça casse ki ou pé brûlé-là dans sonne pétard. Par ene ti sacrifice ki ou faire par résisté contre ça mauvais désir-là, ou pou ranne ou même et ou la famille heureux ici dans dounia et là-bas dans aakhirat.

Donc sonne pétard li travail shaitaan. Li pas travail ene musulman !

[Extrait de Al Jamiat Vol.2 No.13]