Barakat darood shareef

Sheik-ul Hadice Hazrat Maulana Zakariyyah rahmatoullahi ‘alayh dire dans ene de so banne récits ki li fine faire dans so livre “Fazail-e-Daroud”, "place cote Maulana Faizul-Hassan ti mort, pendant ene mois ça place-là fine reste senti bon. Maulana Qaasim fine dire ki ça c’est Barakat de Daroud Shareef parceki chaque jeudi soir Maulana Faizul-Hassan ti pé passe la nuit en envoyant Daroud lors le Prophète ‎(Sallallaahou A'laihi Wasallam)‎."

Ene dimoune ki paraite pas conne respect banne ‘Oulama, fine faire ene commentaire banale lors ça. Li dire :

“Pas ena doute qui banne qui fine envoye plus beaucoup Daroud lors le prophète, et dans ene meilleur façon légale, c’étaient banne Swahaabah. Malgrés sa, nou pas fine trouve ene « Barakat » pareille. Cote zotte fine alle tire sa Barakat la zotte ? Eski quicaine apres banne Swahaabah fine envoye plus beaucoup Daroud lors le prophète et dans ene meilleur façon qui banla ?”

Nou pou remarqué ki ça dimoune-là pas fine amene aukene preuve depi dans Qour’aan ou depi dans hadice pou désapprouve ça récit-là. Li fine necque base so l’opinion lors ene supposition banale. Eski ena kit preuve dans Qour’aan ou dans hadice ki dire ene Barakat ki Sahaba pas fine gagné, ene l’autre pas capave gagne li ? Définitivement perna aukene preuve coumsa. Donc ceki ça dimoune-là fine dire, li pas basé lors aukene preuve dans shariah. Au contraire li contre boucou kitchose dans Qour’aan et dans hadice. Parceki si Hazrat Yunus ‎(Alaihis Salaam)‎‎ ti reste sain et sauf pendant 40 jours dans ventre poisson, pou ça vine vrai, eski li bizin arrivé avec Rassouloullah ‎(Sallallaahou A'laihi Wasallam)‎ aussi ? Si Hazrat Ibrahim ‎(Alaihis Salaam)‎‎ pas ti brûlé dans du feu, eski li bizin arrivé avec Rassouloullah ‎(Sallallaahou A'laihi Wasallam)‎ aussi pou li vine vrai ? Hazrat Khubaib ‎(Radiyallahou anhou‎)‎ ti gagne pou mange ene grappe raisin grosseur la tête ene dimoune pendant ki li ti emprisonné acote banne moushrik dans Makka et pourtant dans ça banne jours-là pas ti ena raisin aukene part dans Makkah. Eski kikene capave permette li dire “Cote sa zotte fine alle tire ça Barakat raisin-là zotte” pou la simple raison ki Hazrat Abou Bakr ‎(Radiyallahou anhou‎)‎ ou Hazrat ‘Oumar ‎(Radiyallahou anhou‎)‎ pas fine gagne ça l’honneur-là ?

Tout ça-là montré ki parfois Allah Ta’ala li accorde ene faveur particulier à ene tipti ki li pas accorde à ene grand. Selon ene anecdote ki Allaamah Bin Taimiyah fine raconté dans so “Al-Fourqaan”, banne l’ennemis ti jette Abou Mouslim Al-Khawlaani dans du feu. Quand banne-là vine guette li, zotte trouve li pé diboute pé faire namaz dans du feu. Eski nou gagne droit dire “Cote zotte fine alle tire ça” ziste acoze ki ça miracle-là pas fine arrive ça avec banne Sahaba-e-Kiraam ‎(Radiyallahou anhou‎)‎ ?

A ce stade, nou pas capave empêche nou dire ki ça commentaire-là li vine de la part ene dimoune ki pas conne Deen ou bien ene ki fine apprane Deen mais ki pas conne so sujet bien.

Pli devant li continué so commentaire futile: "Chaque soir Maulana Fayzul-Hassan ti pé passe la nuit en envoyant Daroud lors le Prophète. Est-ce qui le Prophète fine enseigne nou pou passe la nuit chaque jeudi soir en envoyant Daroud". Li bien difficile pou croire ki ene commentaire pareille capave vine de la part ene ki conne Deen. Mais ça Dounia-là ena tout qualité échantillon. Li pas drôle si ene ki peut être capave ene B.A ou M.A dans Shariat, faire ene commentaire aussi futile. Pou reponne à ça objection-là, nou dimandé eski ena kit hadice ki empêche envoye Daroud dans jeudi soir ? Nou pé pose ene question pareille parceki banne ki autorise faire khutbah en créole, zotte ena l’habitude dimandé si eski ena kit hadice ki empêche faire khutbah en créole. Par cela zotte envie dire ki li permette parceki selon zotte perna narien dans hadice ki empêche ça. Si zotte sincère dans zotte preuve, alors d’après zotte propre preuve même,  passe la nuit chaque jeudi soir dans envoye Daroud li bizin permette. Pas ziste ça. Mais nou ena ene hadice cote Rassouloullah ‎(Sallallaahou A'laihi Wasallam)‎ fine recommande faire boucou Daroud dans la nuit et dans la journée de Jum’ah. Allaamah Ibn Taimiyah fine rapporté dans so Al-Fourqaan ki Rassouloullah ‎(Sallallaahou A'laihi Wasallam)‎ fine dire :

"اكثروا على الصلاة يوم الجمعة وليلة الجمعة فان صلاتكم معروضة على"

“Envoye boucou Daroud lors moi jour Jum’ah et la nuit de Jum’ah parceki zotte Daroud pou présenté divant moi …”

D’après ça hadice-là, Rassouloullah ‎(Sallallaahou A'laihi Wasallam)‎ fine recommande pou faire boucou Daroud dans la nuit de Jum’ah. D’après Shariat, la nuit vine avant la journée. Donc la nuit de Jum’ah c’est ça la nuit ki commencé apartir Maghrib jour jeudi. Dans nou langage nou appelle li jeudi soir mais d’après Shariat c’est vendredi soir ou bien la nuit de Jum’ah. Donc, ki ou trouve pas bon si ene dimoune passe ça la nuit-là, c'est-à-dire la nuit de Jum’ah dans envoye Daroud lors Rassouloullah ‎(Sallallaahou A'laihi Wasallam)‎ acoze ki Rassouloullah ‎(Sallallaahou A'laihi Wasallam)‎ fine recommande ça pratique-là ?

[Extrait de Al Jamiat Vol.3 No.2]