Ene faille mentalité

Ou pas pratique Deen. Acoze ça ou ena tendance à croire ki ou ena ene passe-partout ki permette ou faire tout.

Ou camarade li pratique Deen. Acoze ça li pou vine ene target privilégié de toute sorte de critique. Ou reste attane quand li faire ene erreur pou ou crase so la tête. Tellement ça désir pou trouve li tombe dans l'erreur fatigue ou, ki ena des fois ou blâme li pou banne kitchose ki louable aussi. Pou ou, vaut mieux li ti continué batte so carte enbas pied ki li sorti dans jamaate cote li gagne l'occasion faire so 5 fois namaz avec jamaat pendant ene morceau jours. Faire namaz continuellement pendant ene morceau jours fine transforme ene quantité. Mais ça li l'égarement d'après ou zisse acoze ki zotte pas fine suive ou dans ou vilain manière dénigré banne 'Oulama. C'est vraiment ene faille mentalité.

Eski ça dimoune-là fine faire erreur quand li fine décide pou change so la vie? Aukene dimoune ki ena ene ti pé l'intelligence aussi pas pou dire le contraire. Mais ou l'attitude montré ki ou ti à content ki tous dimoune vine pareil couma ou dans néglige Deen.

[Extrait de Al Jamiat Vol.3 No.8]