Gheebat

Mal cause kikene derrière so le dos appelle gheebat.

Ena ene quantité péchés ki dimoune pé commette lors ça la terre-la mais gheebat li ene péché ki pas seulement banne ki nou conne zotte comme banne mauvais dimoune ki pé commette. C'est ene péché ki banne Imam, banne 'Oulama, banne prédicateurs et banne ki nou conne zotte comme bon dimoune aussi pé commette. Ça aussi pas acoze ki li ene simple péché. C'est ene de pli faille manière et grand péché ça. Rassouloullah ‎(Sallallaahou A'laihi Wasallam)‎ fine qualifié ça de pli grave ki zina et l'intérêt. Mais grand, piti, mauvais dimoune et bon dimoune, tous pé faire li principalement acoze ki zotte pas fine saisi so gravité réelle.

Ene fois en présence Rassouloullah ‎(Sallallaahou A'laihi Wasallam)‎, Hazrat Aisha ‎(Radiyallahou anhou‎)‎ fine cause Hazrat Safiyya ‎(Radiyallahou anhou‎)‎. Rassouloullah ‎(Sallallaahou A'laihi Wasallam)‎ fine attire l'attention Hazrat Aisha ‎(Radiyallahou anhou‎)‎ ki ceki li fine faire li tellement grave et puyenté ki ça capave pollué toute ene l'océan.

Mais li bon conné ena des fois ene mama papa cause so zenfant derrière so le dos dans le souci pou rode ene solution pou so mauvais ki li pé faire. Ça aussi li paraite vine dans catégorie gheebat mais ça façon cause derrière le dos-là li permette parceki zotte pas faire li avec ene l'intention pou humilié ou dénigré zotte zenfants. Coumsa même parfois causé ki ene responsable cause pou ene kikene pou bien-être ça kikene-là, ça aussi li paraite gheebat mais li ene gheebat ki permette parceki si ça kikene-là fine conné ki dans le souci pou so propre bien-être kikene fine cause so causé, ça pas pou déplaire li. Et si ça personne-là li vexé avec ene personne ki pé pense du bien pou li, bé li même en tort parceki ene vexation injustifié pas capave transforme ene bon kitchose en ene mauvais kitchose. Banne 'Oulama d'auparavant fine dévoile banne défauts ki trouve dans banne certaine narrateurs de hadice zisse pou préserve Deen. Ça aussi li permette. Au contraire li obligatoire.

Allah Ta'ala conne tout ceki ena dans nou le cœur. Faudré pas nou servi ça comme ene prétexte pou engage nou dans dénigré et humilié dimoune par cause zotte causé derrière zotte le dos.

[Extrait de Al Jamiat Vol.3 No.9]