Riba, Gheebat et Bouhtaan

Riba …

Riba veut dire l'intérêt. Ene forme commun de l'intérêt, c'est ça somme en plus ki ene dimoune recevoir lors la somme ki li fine déposé dans la banque. Ça li haraam. Pas gagne droit servi li dans mangé boire, dans acheté linge, dans paye loyer ni dans paye l'ammane. Coumsa même pas gagne droit servi li dans construire toilette ou la caze ni dans construire toilette masjid ou madrassah.

D'abord pas bizin rentré même dans ene transaction ki ena l'intérêt. Si la monnaie l'intérêt vine dans ou possession, bizin débarrassé avec ça par dispose ça à banne ki bien pauvre et banne ki dans extrême difficulté sans l'intention de sawaab (récompense).

Faire transaction ki ena ribah (l'intérêt) li couma dire déclare la guerre avec Allah Ta'ala et so Rasoul ‎(Sallallaahou A'laihi Wasallam)‎. Ene dirham de l'intérêt ki ene dimoune li consommé avec connaissance, li pli grave ki commette 36 fois zina. D'après ene hadice, Rassouloullah ‎(Sallallaahou A'laihi Wasallam)‎ fine dire ki riba (l'intérêt) ena 70 niveau (de gravité). Le niveau pli inférieur li couma dire ene dimoune pé ena ménage avec so mama.

Donc riba li ene kitchose bien bien grave ki dimoune par zotte l'ignorance pé prend li pou bien simple.

… Gheebat …

Gheebat veut dire cause mauvais pou ene dimoune derrière so le dos. Nou pou étonné pou conné ki gheebat li pli grave ki l'intérêt.

… et Bouhtaan

Bouhtaan veut dire mette fausse charge lors ene dimoune. Ça aussi li ene grand péché et li pli grave ki faire gheebat.

Souvent nou prend banne rumeurs pou la monnaie content et lors la base ça banne rumeurs-là, nou accuse dimoune pou ceki li pas fine faire. Ça aussi c'est bouhtaan ki li pli grave ki gheebat, riba et zina. Acoze ça Rassouloullah ‎(Sallallaahou A'laihi Wasallam)‎ fine conseille nou pou reste tranquille si nou perna bon causé pou causé.

[Extrait de Al Jamiat Vol.3 No.10]