Prise de position sage

Mo conné ki ou extra content ou ti bébé. D'ailleurs tout dimoune même bizin content so zenfant. D'après ene hadice de Rassouloullah ‎(Sallallaahou A'laihi Wasallam)‎, ene dimoune li content so banne zenfant par ene pitié ki Allah Ta'ala fine mette dans so le cœur. Donc acoze ça, bon ou mauvais, tout dimoune même content so zenfant. Mais faudré pas l'amitié ki ou ena pou ou zenfant faire ou gagne ene l'extrême dégoût pou ça moustique ki fine pose lors so front. Faudré pas ou decontrôlé dans pousse vengeance avec ça moustique-là. Disons si ou tappe ene bon coup pou touye ça moustique-là, perna doute ou ena chance touye li couma ou capave ratte li aussi. Mais eski ou fine imaginé ki pou arrive figure ou zenfant ki ou content li boucou? C'est ou zenfant ki pou subir le coup. Et c'est visage de ou zenfant gâté ki pou blessé et gâté. Et ça aussi sans ki ou fine atteine ou but.

Ça l'exemple-là montré ki li pas sage pou résoudre ene problème par crée ene problème pli grave. Pou ça même raison, Rassouloullah ‎(Sallallaahou A'laihi Wasallam)‎ ti abandonne l'idée reconstruire Ka'abah d'après plan Hazrat Ibrahim ‎(Alaihis Salaam)‎‎.

[Extrait de Al Jamiat Vol.3 No.10]