Da'wah

Pou ene dimoune capave faire da'wah, d'abord li bizin ena ene bon connaissance de ceki li pé enseigné ou propagé ki permette li propage ene kitchose ki correct et authentique.

Pou faire so da'wah vine pli efficace, li bizin agir d'après ceki li pé propagé. Sinon dimoune pou ena raison juge li mal et zotte pas pou écoute li. Et li bizin faire li avec ikhlaas (la sincérité) ki pou encourage li continué so la lutte malgré si personne pas disposé écoute li aussi parceki la sincérité ki li ena dans so travail pou faire li comprend ki li pé faire ça pou faire Allah Ta'ala plaisir. Et ça li pé réalisé quand même personne pas pé écoute li.

Dans travail de da'wah, ene dimoune li bizin poli et gentil envers banne ki li pé adresse zotte. So l'attitude li bizin ene l'attitude sage au lieu ene l'attitude exigeant ou arbitraire ki faire li agir comme ene tyran. Et finalement à jamais li bizin sous estime banne ki li adresse zotte. Li bizin toujours humble en sorte ki ça amene li pou comprend ki li pli concerné par ceki li pé propagé. Jamais li bizin prend li pou supérieur.

Sans ça cinq kitchose-là, li difficile pou trouve l'effet ki bizin dans travail de da'wah.

[Extrait de Al Jamiat Vol.3 No.10]