Combine deux namaz dans ene seul l'heure

Couma faire ene namaz Qaza li ene péché grave, coumsa même combine deux namaz dans ene seul l'heure aussi li ene péché grave. Par exemple si ene dimoune faire namaz Zohar et Assar dans l'heure de Assar ou bien dans l'heure de Zohar, alors ça li ene péché bien grave. Parceki par accomplir namaz dans ça façon-là, la personne li casse l'ordre Qour'aan-e-Kareem et hadice ki oblige faire chaque namaz dans so l'heure prescrit. D'après ene hadice ki trouve dans Tirmizi et ki rapporté par Hazrat Abdullah Bin Abbaas ‎(Radiyallahou anhou‎)‎, Rassouloullah ‎(Sallallaahou A'laihi Wasallam)‎ fine dire ki ene dimoune ki fine combine deux namaz dans ene seul l'heure sans kit raison valable, li fine commette ene de banne péchés majeurs.

Li vrai ki Nabi ‎(Sallallaahou A'laihi Wasallam)‎ ti combine Zohar et Assar dans l'heure Zohar dans la plaine de 'Arafah. Coumsa même li ti combine Maghrib et Esha dans l'heure Esha dans Mouzdalifah. Ça li ene exception ki ziska zordi aussi banne haji gagne droit faire li avec certaine conditions. Mais apart ça, li ene péché bien grave pou faire li. Nou ena banne hadices ki laisse paraite ki Nabi ‎(Sallallaahou A'laihi Wasallam)‎ ti pé accomplir deux namaz dans ene seul l'heure pendant voyage. Mais selon banne hadice pli détaillé, Nabi ‎(Sallallaahou A'laihi Wasallam)‎ ti faire chaque namaz dans so l'heure sans dépasse li. C'est-à-dire li ti pé faire namaz Zohar dans so dernier l'heure et namaz Assar dans so premier l'heure. Coumsa même li ti pé faire namaz Maghrib dans so dernier l'heure et namaz Esha dans so premier l'heure. Chaque namaz ti dans so l'heure mais tous les deux ti pé paraite ensemble dans ene seul l'heure. D'après ene hadice ki trouve dans Tabraani et ki rapporté par Hazrat Mou'az Bin Jabal ‎(Radiyallahou anhou‎)‎, à l'occasion de bataille de Tabouk, Rassouloullah ‎(Sallallaahou A'laihi Wasallam)‎ ti pé faire namaz Zohar dans so dernier l'heure et namaz Assar dans so premier l'heure. Coumsa même li ti pé faire namaz Maghrib dans so dernier l'heure et Esha dans so premier l'heure. Ça façon combine namaz-là fine aussi rapporté par Hazrat Ali ‎(Radiyallahou anhou‎)‎, Hazrat Abdullah Bin Mas'oud ‎(Radiyallahou anhou‎)‎ et Hazrat Aisha ‎(Radiyallahou anhou‎)‎. Donc pas gagne droit tire et déplace ene namaz depi dans so l'heure. Si ena la nécessité, capave faire ene dans so dernier l'heure et l'autre dans so premier l'heure. Dans guetté, tous les deux paraite fine faire dans ene seul l'heure mais en réalité chakene fine faire dans so l'heure.

[Extrait de Al Jamiat Vol.3 No.11]