… Banne Mulhid et Mou'jizah

Banne mulhid ou bien banne perverses, zotte refuse accepté banne miracle ou mou'jizah ki fine manifesté lors la main banne prophètes. Zotte connaissance limité empêche zotte accepté ça. C'est ça même erreur ki zotte faire quand zotte oulé comprend li d'après zotte logique. Mais zotte ignoré conné ki zotte logique ena ene limite cote li arrête fonctionné couma zotte ignoré conné ki ena ene certaine logique ki zotte logique pas comprend. C'est ene logique apart ki bizin ene logique apart pou comprend. Ene dimoune ki ena imaan ki narien pas impossible pou Allah Ta'ala, li pas tombe dans ene piége pareil.

Par exemple ene kitchose ou ene travail ki bizin boucou le temps pou faire, Allah Ta'ala capave faire li arrivé dans ene bien tigite le temps. Rassouloullah ‎(Sallallaahou A'laihi Wasallam)‎ fine faire le déplacement et le voyage de Mi'raaj dans ene bien tigite le temps. Banne ki ti ena imaan, pas fine gagne difficulté accepté li mais banne moushrik et banne kaafir fine trouve li impossible.

Coumsa même Hazrat Soulaimaan alaihissalaam ti faire trône la reine de Saba déplacé depi Yémen à la Syrie dans ene clin d'œil. Banne mulhid zotte perdi dans zotte calcul minute seconde. Dans ene situation pareil, zotte guette distance ki ena entre ça deux l'endroits-là et zotte étonné ki manière ça fine capave arrivé dans ene clin d'œil. Mais zotte blié ki li pas travail Hazrat Soulaimaan alaihissalaam mais c'est Allah ta'ala so travail ki ena capacité faire tout et zotte blié ki dans refuse accepté banne kitchose pareil, en réalité zotte fine refuse accepté ki Allah Ta'ala ena capacité lors tout kitchose. Quant à banne croyants, zotte conné ki ça li vrai parceki ça li travail Allah Ta'ala ki ena capacité lors tout kitchose.

Selon ene récit ki trouve dans Tirmizi, ene personne nommé 'Omair Bin Haani ti pé faire mille rakaats namaz et 100,000 tasbeeh dans ene jour.

Ene dimoune li capave compte minute seconde pou dire ki ça li impossible mais pou ene bon croyant, ça li bien facile parceki Allah Ta'ala capave faire travail ene bon boute le temps arrive dans ene bien tigite le temps. C'est Ilhaad ou la perversité dans Deen ki empêche accepté banne kitchose pareil. Malheureusement banne ki pretanne pé charrié flambeau de la guidance pas fine hesité commette ça genre de perversité dans Deen quand zotte fine refuse accepté banne Karaamat (miracle) pareil par qualifié ça de banne fausse zistoire. Nou conné ki dans bien tard zotte pé réalise erreur ki zotte fine commette et zotte pé regretté avec zotte l'habitude enfantin de goré.

[Extrait de Al Jamiat Vol.3 No.11]