Sajdah tilaawat

Sajdah tilaawat c'est ene sajdah ki vine obligatoire pou faire li quand lire certaines versets dans Qour'aan-e-Kareem. Nou ena 14 places dans Qour'aan-e-Kareem cote li obligatoire faire sajdah quand lire li. Sajdah tilaawat couma li vine obligatoire quand lire li, coumsa même li vine obligatoire quand tanne li avec kikene ki pé lire li. Pou sajdah tilaawat vine obligatoire, faudré li ene dimoune ki namaz obligatoire lors li. Acoze ça si ene madame ki li dans haiz ou dans nifaas tanne avec kikene ene ayat ki ena sajdah tilaawat, li pas bizin faire sajdah tilaawat parceki namaz pas faraz lors ene madame ki li dans ça l'état-là. Quand nou dire ki li pas bizin faire sajdah tilaawat, ça veut dire li pas obligatoire faire li quand li vine propre aussi.

Sajdah tilaawat li vine waajib quand tanne li avec la bouche ene dimoune. Si fine tanne li dans radio ou dans cassette ou bien lors télévision, ça pas faire sajdah tilaawat vine waajib.

Sajdah tilaawat li waajib mais pas obligé faire li toute suite. Ene dimoune ki li pas en mesure faire li toute suite, li capave faire li après. Coumsa même si ene kikene pas oulé faire li toute suite sans aukene raison valable, li perna aukene blâme lors li pourvu li faire li après. Mais ene sajdah tilaawat ki fine vine waajib dans namaz, bizin faire li dans namaz même. Si pas fine faire li dans namaz, bizin faire Istighfaar et tawbah pou ça péché-là effacé. Pas capave acquitté de ça responsabilité-là par faire li en dehors namaz.

Tahaarat (la propreté) pou sajdah tilaawat

Tahaarat complète li nécessaire pou capave faire sajdah tilaawat. Ene dimoune ki tanne ayat ki ena sajdah tilaawat dans ene moment ki li perna tahaarat, bizin faire li quand li gagne so taharaat, c'est-à-dire li bizin ena wazou et ghoussal tous les deux.

L'heure ki sajdah tilaawat permette

Perna aukene l'heure ki empêché faire sajdah tilaawat. A tel point si kikene fine lire ene ayat ki ena sajdah tilaawat ou bien li fine tanne ça avec kikene, dans l'heure ki soleil pé levé, ou bien soleil lors coco ou bien soleil pé couché, li gagne droit faire sajdah tilaawat mais li pli bon ki li attane ene ti pé et li faire li après. Mais ene dimoune pas gagne droit remplace banne sajdah tilaawat ki fine vine waajib auparavant dans ça banne l'heure-là. Li bizin remplace li en dehors ça trois l'heure-là.

Façon faire sajdah tilaawat

Pou accomplir sajdah tilaawat, li pli bon ki ene dimoune li dibouté, li dire Allahou akbar et li alle dans sajdah, li faire tasbeeh et li redire Allahou akbar et li dibouté. Et si li alle dans sajdah depi position assizé même, ça aussi li permette.

La sincérité dans pratique Deen

Ene dimoune li sincère dans pratique so Deen quand li faire li zisse pou faire Allah Ta'ala plaisir. Li pas guette so l'avantage ou bien so l'intérêt personnel. Li guette zisse ceki Allah Ta'ala content quand même li trouve li difficile et li paraite pas dans so l'avantage.

Ene dimoune ki cherche verdict d'après Deen zisse quand li trouve li dans so l'avantage, en réalité li pé servi Deen pou so l'avantage personnel. Ça pas appelle suive Deen. Ça appelle servi Deen. Par exemple ene dimoune ki jamais ti en faveur résoudre so banne problèmes d'après shariah, capave insisté ene beau jour pou résoudre problème l'héritage d'après shariah acoze ki li trouve verdict de shariah li pli profitable pou li. Mais quand li trouvé ki so tifille pou gagne l'héritage moins ou bien pas pou gagne narien d'après shariah, li capave amene ene thèse ki bizin suive la loi du pays avec ene fausse prétexte ki li pas dans pays islamique. Ene dimoune avec ene l'attitude semblable à l'égard de Deen, pas capave être qualifié de ene pratiquant sincère. C'est necque ene jouisseur ki pé servi Deen pou so l'avantage personnel. C'est banne hypocrite ki ti pé faire coumsa dans l'époque Nabi ‎(Sallallaahou A'laihi Wasallam)‎. Quant à banne Sahaba-e-Kiraam, zotte ti pé suive Deen dans tous banne aspects et circonstances sans considère zotte l'avantage personnel. Hazrat Rafi' Bin Khadij ‎(Radiyallahou anhou‎)‎ so la famille ti abandonne ene certaine transaction ki ti bien profitable zisse acoze Nabi ‎(Sallallaahou A'laihi Wasallam)‎ ti empêche zotte. Pou zotte pas ti ena aukene choix apart obéir Nabi ‎(Sallallaahou A'laihi Wasallam)‎ parceki pou zotte, l'obéissance Nabi ‎(Sallallaahou A'laihi Wasallam)‎ ti pli profitable ki ça profit ki zotte ti pé gagné dans ça transaction-là. Et c'est ça même l'état d'esprit ki ene musulman bizin ena! Au cas contraire, ou pou ene jouisseur non plus ene suiveur.

[Extrait de Al Jamiat Vol.3 No.11]