Namaz janaza dans Masjid?

Hazrat Aisha ‎(Radiyallahou anhou‎)‎ fine dimane banne Sahaba-e-Kiraam ‎(Radiyallahou anhoum‎)‎ pou amène janaza Hazrat Sa'd Bin Abou Waqqaas dans masjid afin ki li aussi li capave participe dans so namaz janaza depi dans so la caze ki trouve à touché avec Masjid. Banne Sahaba-e-Kiraam ‎(Radiyallahou anhoum‎)‎ fine étonné par ça requête-là. Mais Hazrat Aisha ‎(Radiyallahou anhou‎)‎ fine repone zotte ki Rassouloullah ‎(Sallallaahou A'laihi Wasallam)‎ ti déjà faire namaz janaza Hazrat Souhail Bin Al-Baidwa ‎(Radiyallahou anhou‎)‎ dans masjid. Coumsa même Hazrat Abdullah Bin 'Oumar ‎(Radiyallahou anhou‎)‎ rapporté ki namaz janaza Hazrat 'Oumar ‎(Radiyallahou anhou‎)‎ ti faire dans masjid. Ça li donne l'impression ki gagne droit faire namaz janaza dans masjid. Mais li paraite ki ça pas ti ene pratique régulier et établi. Ti capave pé faire li occasionnellement pou banne raisons spécifiques. C'est la raison pou laquelle ki banne Sahaba-e-Kiraam ‎(Radiyallahou anhoum‎)‎ fine trouve la requête de Aisha ‎(Radiyallahou anhou‎)‎ étrange et drôle parceki d'après zotte c'était ene pratique interdit. Probablement zotte fine capave trouve li drôle et interdit lors la base ene hadice ki Abou Hourairah ‎(Radiyallahou anhou‎)‎ fine rapporté selon lequel Rassouloullah ‎(Sallallaahou A'laihi Wasallam)‎ fine dire:

"Celui ki faire namaz janaza dans kit masjid, alors li pena narien à gagner."

C'est-à-dire pena aukene récompense dans faire namaz janaza dans masjid. Donc nou ena ene hadice ki pé montré ki Rassouloullah ‎(Sallallaahou A'laihi Wasallam)‎ fine faire li et l'autre hadice pé montré ki Rassouloullah ‎(Sallallaahou A'laihi Wasallam)‎ fine empêche li. Dans ene situation pareil, d'après principe bizin donne priorité hadice ki empêché parceki li pli probable ki ça ti autorisé auparavant mais ça fine interdit plitard. Et l'attitude de banne Sahaba-e-Kiraam ‎(Radiyallahou anhoum‎)‎ ki ti trouve la requête de Aisha ‎(Radiyallahou anhou‎)‎ étrange, li approuve et renforci ça possibilité-là.

[Extrait de Al Jamiat Vol.3 No.12]