Quand eid tombe ene jour jum’ah!

Quand Eid tombe ene jour jumm'ah, eski bizin faire jum'ah ça jour-là ou bien pas bizin faire jum’ah‎ ça jour-là?

Autant ki nou conné, nou pas conne kikene ki dire ki pas gagne droit faire jum’ah‎ ça jour-là. Li vrai ki ena ene ti groupuscule ki dire ki capave pas faire jum’ah‎ ça jour-là. Mais selon la grande majorité, li pas permette pou néglige ou abandonne jum’ah‎ parceki l'obligation de jum’ah‎ li prouvé par banne preuves authentiques et catégoriques depi dans Qour'aan et dans Hadice. Ene pratique ki prouvé par banne preuve de ene tel calibre, pas capave néglige li lors la base banne simple hadice ambigu.

Ena banne hadice ki donne l'impression ki ça ti permette et ki Rassouloullah ‎(Sallallaahou A'laihi Wasallam)‎ fine autorise pas faire li. Mais à la lumière banne hadice pli détaillé, ça ti adressé à ene certaine catégorie dimoune. Li pas ti adressé à tous banne dimoune. D'ailleurs d'après hadice, Nabi ‎(Sallallaahou A'laihi Wasallam)‎ ti faire namaz jum’ah‎ jour jum’ah‎ avec banne habitants de Madina. D'après ene hadice ki trouve dans Abou Dawoud et Ibn Maajah, Rassouloullah ‎(Sallallaahou A'laihi Wasallam)‎ ti dire: "Zordi deux Eid fine tombe ensemble. Si kikene oulé ça (namaz Eid), li capave dispense li de namaz jum’ah‎. Mais nou, de toute façon nou pou faire Jum’ah‎."

Quand Nabi ‎(Sallallaahou A'laihi Wasallam)‎ fine dire "Nous" ça signifié Nabi ‎(Sallallaahou A'laihi Wasallam)‎ et banne habitants dans Madina. Donc ça prouvé ki Nabi ‎(Sallallaahou A'laihi Wasallam)‎ et banne habitants dans Madina ti faire namaz Jum’ah‎. Ça montré ki l'autorisation pou pas faire Jum’ah‎ ti adressé à ene l'autre catégorie de personne. C'était banne dimoune ki ti pé habite en dehors Madinah et ki ti pé vine faire namaz Eid et namaz Jum’ah‎ malgré ki ça pas ti obligatoire lors zotte. Quand Eid fine tombe dans jour Jum’ah‎, zotte fine bizin vine bonheur gramatin pou capave faire namaz Eid. Après namaz Eid, zotte ti ena deux choix. Soit zotte reste attane ziska namaz Jum’ah‎ ou bien zotte alle zotte la caze et retourne Madinah pli tard pou namaz Jum’ah‎. Dans tous les deux façons, zotte ti ena ene certaine difficulté. Alors pou facilite zotte tache. Nabi ‎(Sallallaahou A'laihi Wasallam)‎ ti lance ça l'appel-là ki celui ki oulé attane, li capave attane mais celui ki oulé retourné, li capave alle so la caze. C'est ça catégorie de personne-là ki ti concerné par ça annonce-là. D'ailleurs namaz Jum’ah‎ même pas ti obligatoire lors zotte acoze ki zotte ti pé habite dans la campagne retiré en dehors Madinah. A Maurice, nou pena ça catégorie de personne-là. Donc bizin faire Jum’ah‎, même si Eid aussi tombe dans jour Jum’ah‎.

Ene conseil à banne prédicateurs insouciants

Li pas digne pou banne prédicateurs vine lors micro pou farouche dimoune de namaz Jum’ah‎. Ene Ibaadat ki Nabi ‎(Sallallaahou A'laihi Wasallam)‎ fine faire avec banne habitants de Madinah, li bizin au moins ene kitchose ki li pli bon nou faire li. Mais zordi jour nou banne prédicateurs pé faire causerie avec prétexte pé enseigne Deen mais au fond pé faire campagne pou farouche dimoune faire namaz jum’ah‎. Quand Nabi ‎(Sallallaahou A'laihi Wasallam)‎ donne ene l'autorisation pure et simple à banne madames vine faire namaz dans masjid, zotte servi ça couma dire madame obligé vine faire namaz dans masjid. Coumsa même quand Nabi ‎(Sallallaahou A'laihi Wasallam)‎ donne l'autorisation à ene certaine catégorie de personne pou pas faire Jum’ah‎, zotte faire campagne dans masjid lors micro ki faire banne dimoune croire ki pas gagne droit faire namaz Jum'ah. Coumsa même zotte insisté, persisté et faire la tête dir pou faire Khutbah en créole couma dire obligé faire Khutbah en créole même.

Li vrai ki lors plan campagne zotte fine réussi, quoique ki ça réussite temporaire-là pé tini lors zépaule faible de banne ki pas conné. Mais ça aussi li vrai ki lors plan preuve, zotte fine échoué.

[Extrait de Al Jamiat Vol.3 No.12 et Vol.4 No.5]