L'héritage

L'héritage c'est ça du bien ki ene dimoune quitté après so la mort. En principe banne ki ena part dans ça l'héritage-là, c'est la personne so madame, so zenfants et so mama papa.

D'après shariah, ene garçon li gagne l'équivalence de ceki deux ti filles gagné. Faudré pas ene ti fille li qualifié ça la partage-là de l'injustice parceki c'est l'ordre Allah Ta'ala. Nou bizin accepté l'ordre Allah Ta'ala couma li été sans kit hésitation. Si kikene objecté ou refuse accepté, li vine ene kaafir.

L'héritage entre musulman et non musulman

Rassouloullah ‎(Sallallaahou A'laihi Wasallam)‎ fine dire ki ene musulman pas capave hérite ene non-musulman ni ene non-musulman capave hérite ene musulman. C'est-à-dire si ene dimoune fine embrasse l'Islam, alors li pas pou ena aukene droit dans du bien so mama papa après zotte la mort. Ni so mama papa pou ena kit droit dans so du bien si li arrivé mort. Mais si marna papa fine donne li so part dans zotte vivant même ou bien banne zhéritiers fine accepté donne li so part après zotte la mort, à ce moment-là li pou couma ene cadeau ki li ena droit accepté li.

L'héritage pou ene zenfant ki encore dans ventre

Si ene dimoune mort quand so madame enceinte, alors bizin attane ça madame-là accouché pou faire la partage parceki ça zenfant-là aussi ena so part dans l'héritage. Si jamais bizin faire même la partage, alors bizin faire provision pou ça zenfant ki pencore née-là aussi.

Part ene mama papa

Ene mama papa aussi ena part dans l'héritage ki zotte zenfant quitté après zotte la mort. Quand ene dimoune mort dans la pratique c'est so madame et zenfant ki prend tout du bien. Et pourtant d'après shariah ça dimoune-là so marna papa aussi ena zotte part dans l'héritage. Mais lors la force la loi du pays, banne zenfants et madame ça dimoune-là pas laisse ça dimoune-là so mama papa gagne ceki zone merité d'après Shariat. C'est ene l'injustice. Ça appelle coquin ki banne dimoune soit disant civilisé pé faire li sous couverture légale. Ena ene grand compte pou rendé cote Allah jour Qiyaamat!

L'héritage ene zenfant adoptif

Quand ou fine adopté ene zenfant ça zenfant-là pas vine ou propre zenfant. Li continué reste zenfant so mama papa quand même ou fine déclare li lors ou nom et quand même zenfant-là conne ou même couma so mama papa et quand même zenfant-là fine crié ou même mama papa depi tout le temps. Malgré tout ça-là li pas ou zenfant. Donc li pena droit à aukene part dans ou l'héritage et ni ou ena kit part dans so l'héritage. Si zenfant-là quitte ene gros du bien et li mort, c'est so mama papa réel ki pou ena droit à ene part dans so l'héritage d'après shariah quand même zotte pas fine guette li du tout. Donc quand ou adopté ene zenfant et ou déclare li lors ou nom, ou pé faire ene l'injustice envers ou banne zhéritiers légitime et réel lors la force la loi du pays. Par exemple ou pena zenfant mais ou ena ou frère soeur et ou capave ena mama papa aussi. Si ou fine quitte ene du bien après ou la mort, en principe c'est ça banne-là ki pou hérite li. Mais quand ou fine adopté ene zenfant et ou fine mette li lors ou nom, alors d'après la loi, c'est ça zenfant-là ki ou zenfant. Après ou la mort, c'est li même ki pou hérite tout. Et pourtant c'est ou mama papa ki ti bizin hérite ça si zotte encore vivant. Sinon c'est ou frères soeurs et neveux nièces ki ti pou vine ou banne zhéritiers. Quand ou adopté ene zenfant ou bizin réalisé ki ça implique prive ou banne zhéritiers légitime de zotte droit ki zotte merité d'apres shariah.

[Extrait de Al Jamiat Vol.3 No.12]