Trois catégories dimoune ki Allah Ta'ala pas pou adresse zotte la parole jour Qiyaamat

Ena trois catégories dimoune ki Allah Ta'ala pas pou adresse zotte la parole jour Qiyaamat ni pou purifié zotte. Et zotte pou ena ene punition bien pénible:

1. Ene vieux dimoune ki dans zina,
2. Ene le roi ki ene grand menteur,
3. Ene dimoune misère ki vantard.

Explication:

Pas adresse la parole veut dire ki pas pou cause avec zotte dans ene bon façon tellement Allah Ta'ala pou en colère avec zotte.

Pas pou purifié zotte veut dire pas pou gracié zotte. Tout ça-là acoze ki ça péché ki zotte fine commette-là li déjà grave et quand analyse ça par rapport à zotte statu, li vine pli grave encore.

• Ene vieux dimoune ki dans zina …

Si ene jeune ki ena tout so courage arrivé commette zina, li déjà ene kitchose grave malgré ki li ena ene motif assez fort ki dimoune capave comprend. Mais ça kitchose-là, quand li émane de la part ene vieux ki so la moitié le corps fine fini rente dans Qabar, pou paraite pli grave. Ça montré ki ça dimoune-là li impure de par so nature même.

• … Le roi menteur …

Ene le roi menteur paraite bien drôle parceki dimoune cause menti acoze ki zotte peur kikene. Normalement ene le roi perna personne pou li peur. Si malgré ça li cause menti, ça montré ki dans so nature même ena ene vilain manière.

• … Et ene dimoune misère ki vantard

Normalement ene dimoune bizin ena de quoi pou li faire vantard. Ene dimoune misère ki perna narien et malgré ça li vantard, ça montré ki so l'intérieur bien sale.

Bref zina, mensonge et vantardise c'est banne actions bien grave. Mais quand ene dimoune faire li malgré ki pena aukene raison ou motif pou faire li, ça faire ça banne actions-là vine pli grave. Acoze ça, banne ki ena ça dans zotte, zotte bien détestable dans lizié Allah Ta'ala.

[Extrait de Al Jamiat Vol.3 No.13]