Dajjaal

Dajjaal li dérivé de Dajl ki signifié fausseté, mensonge, déception etc. Dans ça sens-là, ça nom-là li capave applique lors chaque dimoune ki li ene grand menteur ou ene grand malhonnête. Mais le Dajjaal ki so l'avènement fine annoncé dans banne hadices, c'est ene personne spécifique de la communauté juive ki pou appelle "Maseeh". Li pou ena ene seul lizié et dans so lotte lizié pou ena ene grosseur couma raisin ki sorti en dehors. Pou ena trois alphabètes ك ف ر ki pou écrire entre so deux lizié. Li pou tellement évident ki tout dimoune capave lire li. So cheveux pou extra bouclé et maille-maillé. Li pou voyage lors ene gros bourrique. D'abord li pou paraite dans ene l'endroit entre Shaam et Iraq et li pou déclare li prophète. Après ça li pou vine dans ene l'endroit ki appelle Isfahaan cote li pou gagne 70,000 juifs pou suive li. Après ça pou ena ene l'étape cote li pou déclare li Allah. Li pou montré ene quantité miracles pou convaincre banne dimoune. Finalement li pou touye ene dimoune et li pou faire li revive. Ensuite li pou essaye pou touye li ene deuxième fois mais li pas pou capave faire li. C'est dans ça façon-là Allah Ta'ala pou déshonore li par ranne li incapable.

Quand Dajjaal pou paraite?

Dajjaal pou paraite après Imam Mahdi (R). C'est-à-dire quand Imam Mahdi (R) pou fini terminé avec jihaad contre banne chrétiens et la conquête de Constantine, li pou vine établi dans Damasque cote li pou occupe banne problèmes musulmans. Lerla Dajjaal pou paraite. En passant par Yémen, accompagné de so l'armée, li pou essaye rente dans Makkah mais li pas pou réussi parceki li pou trouve banne farishta autour Makkah. Li pou tente pou rente dans Madinah aussi. Ici aussi banne farishta pou empêche li.

Quand Dajjaal pas pou réussi rente dans Makkah et Madinah, li pou prend direction Shaam. Le temps ça, Hazrat Issa ‎(Alaihis Salaam)‎‎ pou dessane depi lors le ciel cote minarette ki trouve dans l'Est de Jami Masjid de Damasque.

L'avènement de Hazrat Issa ‎(Alaihis Salaam)‎‎

L'avènement de Hazrat Issa ‎(Alaihis Salaam)‎‎ li ene de banne points et croyances important ki prouvé par Qour'aan-e-Kareem, banne hadice Moutawwatir et le consensus de l'Oummah dans ene façon ki pas laisse aukene doute. Donc li faraz pou croire là-dans.

Hazrat Issa ‎(Alaihis Salaam)‎‎ pou dessane depi lors le ciel, escorté par deux farishta cote ça minarette ki trouve dans l'Est de Jami Masjid de Damasque dans ene l'heure ki Hazrat Mahdi pé alle diboute dans namaz Fajar. Après avoir termine namaz, Hazrat Issa ‎(Alaihis Salaam)‎‎ accompagné de Hazrat Mahdi ‎(Alaihis Salaam)‎‎ pou attaque Dajjaal et so l'armée. Et finalement Hazrat Issa ‎(Alaihis Salaam)‎‎ pou réussi gagne Dajjaal et pou touye li dans ene l'endroit ki appelle "Baab Ludd".

[Extrait de Al Jamiat Vol.3 No.15]