Ene narrateur Maqboul

Selon ene banne ki déclare zotte impé pli malin ki lezot, ene narrateur Maqboul c'est ene narrateur ki so hadice li faible aussi longtemps ki li pas supporté par ene l'autre narrateur. Et zotte attribué ça définition-là à Allaamah Bin Hajar Asqalaani. Par ça nou comprend ki ene narrateur faible li Maqboul (acceptable) d'après Allaamah Bin Hajar Asqalaani quand même li pena personne ki supporté li. D'abord nou étonné ki manière ene rawi ki Layyinul hadice ou bien ene ki so hadice faible et ki personne pas soutenir li, capave vine ene narrateur Maqboul.

Ene "Maqboul" c'est ene ki valable et acceptable. Nou pas comprend couma ene ki faible capave être valable et acceptable. Et ceki pli étonnant couma ene narrateur Maqboul (acceptable) so hadice capave être ene hadice faible? Oui ça nou comprend ki quand ene hadice faible li supporté par ene l'autre hadice, li vine ene hadice ki capave considère li. Mais ene narrateur ki so hadice li faible, li vine ene narrateur Maqboul sans ki li supporté par ene l'autre narrateur, ça c'est la première fois ki nou pé tendé. C'est ene innovation et ene bid'ah dans le domaine de hadice. Nou faire ressortir ki ça définition ki ça banne B.A ou M.A fine donné, c'est ene définition ki pas trouve aukene part. ni zotte capave faire importe li de zotte maison-mère aussi. Et ni ça li trouve dans Taqreeb-ut-Tahzeeb de Ibn Hajar. Nou invite zotte pou prouve ceki zotte fine dire par produire le texte arabe et so traduction. Mais zotte pas pou réussi faire li parceki zotte fine fini dérapé encore ene fois.

Comme ene conseille nou dimane ça groupe-là pou suspanne ça "frère" ki écrire banne kitchose erroné pou ça pas gâte zotte l'image ki fine déjà fini gâté par banne dérapage répété.

En réalité d'après Ibn Hajar, ene rawi مقبول c'est:

من ليس له من الحديث الا القليل ولم يثبت فيه ما يترك حديثه من اجله واليه الاشارة بلفظ مقبول حيث يتابع والا فلين الحديث"

"Celui ki ena bien tigite hadice et perna narien concrète dans li ki nécessite quitte so hadice acoze ça, alors fine attire l'attention à ça même catégorie par le terme مقبول quand li bénéficié support. Sinon li ene لينالحديث (celui ki so hadice faible)."

Ça montré ki d'après Allaamah Bin Hajar, ene narrateur :

1. Ki pena aukene critère ki dimane rejette so hadice,
2. Ki supporté par ene l'autre.

Lerla ça li qualifié de ene narrateur Maqboul.

Sinon li ene لينالحديث(celui ki so hadice faible). Ça montré ki Maqboul et لينالحديث c'est deux différent catégorie de narrateurs. Mais d'après ça banne-là, ene narrateur Maqboul c'est ene layyinul hadice. C'est-à-dire d'après zotte tout les deux pareil. Et ça c'est ene erreur flagrant.

Malhonnêteté intellectuelle

Ceki pli étonnant encore, depi à peu près ene banané fine faire zotte conné ki zotte fine faire ene grand gaffe dans comprend et faire comprend ene hadice cotte zotte fine change le mot Qaadsiyyah par Faarsiyyah. Au lieu corrige zotte propre erreur, zotte trouve dimoune so erreur cotte pena erreur. Pas fini! Zotte comprend et rode faire comprend ceki pena dans livre ki zotte fine faire référence. C'est vraiment la bassesse et malhonnêteté intellectuelle ki Allah Ta'ala pé faire zotte subir. C'est grâce à ça manque du respect ki zotte fine montré pou banne Awlia Allah. Nou conné après tout ça-là ki zotte pas pou reconnaite zotte erreur et zotte pou préfère garde banne dimoune dans l'erreur et dans noireté.

Mais toujours nou dire zotte: Soit zotte accepté zotte erreur avec tout dignité ou bien zotte continué justifié l'injustifiable dans la bassesse.

[Extrait de Al Jamiat Vol.4 No.3]