Pas faire zouloum

Arrête faire zouloum. Et ça aussi lors ou propre zenfant ki ou pretanne content boucou. Ou zenfant couma li ena droit gagne ene bon traitement dans mangé, boire, resté, et habillé, coumsa même li ena droit à ene bon l'éducation. Et surtout l'éducation de Deen. Presque tout dimoune reconnaite ki ene zenfant li bizin bien nourri, bien logé et bien éduqué pou li capave dans so bien être. Acoze ça presque tout dimoune donne l'emphase lors ça banne kitchose-là. Mais bien tigite dimoune paraite ki zotte conné ki le vrai bien être zotte zenfant trouve dans l'éducation de Deen parceki c'est ça même ki pou assure zotte le salut éternel. Acoze ça, bien tigite dans tigite ki porte l'intérêt ki bizin lors l'éducation de Deen.

Li nou devoir ki nou donne nou zenfant l'éducation de Deen et nou amène zotte pou vive ça Deen-là et facilite zotte évolué comme ene bon musulman dans nou la caze. Sinon li pou ene pli grand l'injustice envers ça banne innocents-là de nou part. Pas necessaire faire dominer avec ene étranger même pou nou lève couma ene zaalim jour Qiyaamah. Par empêche nou zenfant évolué couma ene bon musulman dans nou la caze aussi capave faire nou gagne ça mauvais titre de zaalim (injuste) jour Qiyaamah. Donc nou bizin mette dans nou la tête ki prive nou banne zenfant de l'éducation et la pratique de Deen, c'est ene pli grand zouloum (l'injustice) envers nou propre zenfant.

L'éducation de Deen à nou banne zenfant li bizin commencé depi dans nou la caze même. Mama papa bizin faire namaz, faire tilaawat Qour'aan, faire zikrullah dans la caze pou zenfant-là gagne l'occasion vive dans ene l'atmosphère de Deen. Faudré pas cause banne causé grossier. Faudré pas mette chanté dansé ou bien guette film dans la caze pou banne zenfant pas gagne ça banne mauvais l'habitude-là et pou ki zotte conné au moins ki ça banne kitchose-là pas bon. Li pou ene zouloum de nou part si nou pas fine vive dans ene façon islamique dans nou la caze ki ti capave permette nou banne zenfant vive dans ene l'environnement islamique. Nou banne institutions et banne madrassah zotte pou faire zotte travail à zotte niveau mais sans collaboration et sans support mama papa, ça travail-là pas pou faire couma bizin. Faudré ça travail-là commencé dans la caze même et li continué faire quand même si ça zenfant-là arrête fréquente kit institution islamique. Sinon ça zenfant-là ena toute chance apprane l'Islam necque couma ene sujet ki pas pou ena narien à faire avec so la vie pratique. Donc pas pratique l'Islam dans la caze li ene zouloum envers nou même et nou zenfant.

[Extrait de Al Jamiat Vol.4 No.6]