Péché

Casse l'ordre Allah Ta'ala li ene péché. Et tout kitchose ki implique désobéissance Allah Ta'ala li ene péché. Ça li dégrade ene dimoune dans lizié Allah Ta'ala. Aukene maquillage l'honneur pas prend lors ene dimoune quand li fine dégradé dans lizié Allah Ta'ala. Li capave ena titre par tonne mais li pas pou ena ene grain dignité aussi si li dans péché. Pli ene dimoune li dans l'obéissance, pli li vine honorable. Et pli l'honorable c'est celui ki pli dans obéissance. Ça dignité et l'honneur ki ene dimoune gagné quand li reste dans l'obéissance Allah Ta'ala, li reste intact. Mille ou dénigré ene dimoune semblable, mais ou faire ou même malheur. Dimoune-là li pou reste pareil. Quand ene dimoune mal parle ene dimoune ki l'honorable dans lizié Allah Ta'ala, li brise so propre l'avenir. Couma dire li pé tappe so la tête lors ene roche cote so la tête même pou cassé sans affecté ça roche-là. Selon Al Yawaqeet de Sheikh Abdul Wahhab Ash-Sheraani (R), Abou Abdullah Al-Quraishi (R) ti habitué dire:

"Celui ki dénigré ene ki wali pou Allah Ta'ala, alors Allah Ta'ala pou pique so le cœur avec ene flèche envenimeux. Et ça dimoune-là pas pou mort tanque ki so aqeedah pas fini gâté. Et ena toute chance ki li pou mal fini."

L'effet de péché

Ene dimoune li ranne li bien misérable quand li casse l'ordre Allah Ta'ala. Et en général dimoune li subir difficulté acoze le mauvais ki li fine faire. Allah Ta'ala dire dans Qour'aan-e-Kareem:

"Et tout ceki ou subir comme difficulté, c'est ceki ou la main fine faire. Et (Allah Ta'ala) li pardonne boucou plis encore." (V30/S42)

C'est-à-dire tout banne difficulté ki ene dimoune gagné, c'est l'effet de so banne mauvaises actions. D'après banne savants de tafseer, ça verset-là li applique particulièrement pou banne dimoune ki zotte la vie en désordre et zotte transgresse la loi Allah Ta'ala. Quant à banne bon dimoune, ça banne difficulté ki zotte gagné-là, li vine ene moyen pou monte zotte grade dans aakhirat. Ça verset-là montré ki ene dimoune li capave gagne problème et difficulté si li mal comporte li. Et en général quand banne dimoune tombe dans péché, Allah Ta'ala li dessane so punition lors la terre en plusieurs forme. Ena péché ki attire banne maladies et toute sorte l'épidémie ki pas ti existé auparavant couma ena péché ki amène la sécheresse. D'après le sens ene hadice, banne dirigeants c'est le reflet de ceki nou été. C'est-à-dire si nou dans l'ordre, nou banne dirigeants aussi pou banne bon dirigeants et si nou casse l'ordre Allah Ta'ala, nou bizin pas attane pou ena banne bon dirigeants.

… Et la solution

La solution li trouve dans arrête casse l'ordre Allah Ta'ala et dans suive Deen. Allah Ta'ala so Deen li garanti le succès dans dounia et dans aakhirat. Li garanti le succès des individus et pou la société en général. Li ene succès lors plan national et international. Allah Ta'ala dire dans Qour'aan-e-Kareem:

"Si banne habitants dans ça banne l'endroits-là ti amène Iman et ti ena taqwa, nou ti pou ouvert (la porte) banne bénédictions ki trouve dans le ciel et dans la terre mais zotte fine démenti, alors nou fine attrape zotte pou ceki zotte fine faire." (V96/S7)

Ça verset-là montré ki obéir Allah Ta'ala et vive d'après Deen, li amène bénédiction dans la vie banne dimoune. Donc ene la vie ki pena Deen, c'est ene la vie bien misérable. Et ça li pou vine encore pli misérable dans aakhirat.

Dans ene l'autre place dans Qour'aan, Allah Ta'ala dire:

"Et celui ki faire banne bon actions ki ce soit ene missié ou ene madame en état ki li ene croyant, sans doute nou pou faire li vive ene bon la vie. Et sans doute nou pou donne zotte ene récompense ki pli bon ki ceki zotte ti pé faire."

Ça montré ki chaque zeffort ki ene dimoune faire pou jouir so la vie par casse l'ordre Allah Ta'ala, en réalité c'est ene zeffort pou brise so la vie. Vrai la joie dans la vie li trouve uniquement dans vive d'après ceki Allah Ta'ala oulé.

[Extrait de Al Jamiat Vol.4 No.6]