Siha sittah

Pou banne savants de hadice, Siha Sittah signifié les six livres authentique de hadice:

1. Sahih Boukhari
2. Sahih Mouslim
3. Sounan Nisaa-ï
4. Sounan Tirmizi
5. Sounan Abou Dawoud
6. Sounan Ibn Majah

Ça banne livres-là zotte contenir banne hadice authentique. Quant à banne hadice faible ki trouve dans Nisaa-ï, Tirmizi, Abou Dawoud et Ibn Majah, zotte bien minime. Et ça pas empêche qualifié zotte de banne livres authentique.

Quand appelle ça banne livres-là authentique, ça à aukene moment pas signifié ki banne hadice Saheeh (authentique) zotte renfermé dans ça six livres-là seulement. Ena ene qualité hadice ki authentique mais ki capave pas trouve dans ça six livres-là. Donc faudré pas faire erreur rejette ene hadice pou la simple raison ki li pas trouve dans ça six livres-là. Coumsa même li ene grand erreur rejette banne hadice ki pas trouve dans Sahih Boukhari et Sahih Mouslim. Parceki selon Al-Isma-ili, Imam Boukhari fine déclaré:

"لم اخرج فى هذا الكتاب الا صحيحا وما تركت من الصحيح اكثر" (هدى السارى)

"Mo pas fine rapporte narien apart ceki authentique dans ça livre-là. Banne hadice authentique ki mo fine quitté, li plis ki ça." (Hadyus-Saari)

Imam Muslim aussi jamais fine pretanne ki li fine couvert tous banne hadice Sahih dans so Sahih Mouslim.

C'est-à-dire ena encore boucou hadice Sahih mais ki pas trouve dans ça deux livres-là. Li vrai ki banne hadice dans Sahih Boukhari et Sahih Mouslim zotte banne hadice bien authentique. Mais ça li pas ene raison pou dire ki lezot banne hadice zotte pas authentique parceki nou pas capave servi ene ki pli authentique comme prétexte pou qualifié ene ki moins authentique de pas authentique.

Ene erreur pli grave

C'est ça même erreur grave ki ene certaine groupe fine faire quand zotte refuse accepté hadice comme ene l'autorité dans Deen sous prétexte ki li pas authentique et catégorique couma Qour'aan-e-Kareem. C'est ene kitchose bien grave et dangereux ki Nabi ‎(Sallallaahou A'laihi Wasallam)‎ fine mette l'Oummah en garde conte ça. C'est ene façon ki donne l'occasion mal interprète Qour'aan-e-Kareem.

Li bon conné ki sans hadice nou pas pou capave comprend Qour'aan. Coumsa même sans l'aide banne Aimmah, nou pas pou capave conne la vrai signification et porté hadice de Nabi ‎(Sallallaahou A'laihi Wasallam)‎. Donc couma li important passe par hadice pou comprend Qour'aan-e-Kareem correctement, coumsa même li bien important servi recherche de banne Aimmah pou capave comprend hadice correctement. Ça montré ki la bonne compréhension de Deen li depanne lors comprend hadice de Nabi ‎(Sallallaahou A'laihi Wasallam)‎ à lumière recherche banne Aimmah parceki recherche de banne Aimmah li ene garant pou hadice et hadice li garantie l'interprétation correcte de Qour'aan.

[Extrait de Al Jamiat Vol.4 No.9]