Ene ti analyse

Remplie ene verre de l'eau. Après ça plonge ou le doigt et tire li guetté. Ki quantité de l'eau ena dans ou le doigt? Eski li pas vrai ki ena ene tigite narien ditout ki pas représente narien divant ça tigite de l'eau ki rempli dans ça verre-là? Si ou fine saisi ça point-là, alors compare ça l'humidité lors ou le doigt-là avec la quantité de l'eau ki ena dans ou bassin ou bien dans ou resiglass. Li pli pas représente narien. Pas nécessaire compare li avec de l'eau l'océan pou dire ki ça l'humidité lors le doigt-là pas représente narien. Même banne grand grand la rivière ou banne lacs pas représente presque narien divant l'océan.

Nou Nabi ‎(Sallallaahou A'laihi Wasallam)‎ fine donne ene l'exemple similaire pou montré ki ça dounia-là li pas vaut narien divant aakhirat. Ça dounia-là li pas vaut narien divant aakhirat couma ça l'humidité lors le doigt-là li pas vaut narien divant l'océan. Intelligent c'est banne ki pas quitte l'océan et galoupe derrière ene ti goûte de l'eau. Intelligent c'est banne ki pas néglige zotte aakhirat derrière dounia.

Dounia li temporaire et aakhirat li pou tout le temps. Li pas sage pou quitte ene kitchose ki pou reste pou tout le temps acoze ene kitchose temporaire. Dimoune ki ena l'esprit pas faire ene erreur pareil. Selon ene hadice, Nabi ‎(Sallallaahou A'laihi Wasallam)‎ fine dire ki intelligent c'est celui ki contrôle so nafs et li travail pou après la mort.

[Extrait de Al Jamiat Vol.4 No.10]