La bonté Allah Ta'ala

Allah Ta'ala li bon et so bonté pena limite. Li content so banne serviteurs plis ki ene mama content so ti bébé ki li pé encore allaité. Ki ene mama pas capave faire pou so zenfant? Li capave donne tout et sacrifié li même si fallait pou le bien être de so zenfant. Et en général tout dimoune même ena ça dans li ki li accepté faire sacrifice pou so bien aimé.

Quand nou dire ki Allah Ta'ala content so banne serviteurs plis ki ene mama content so banne serviteurs, c'est zisse pou donne ene ti l'idée de la quantité ki Allah Ta'ala content nou. Sinon pena aukene comparaison. Allah Ta'ala so l'amitié li inestimable et pena limite couma Allah Ta'ala li au delà de tout limite.

Allah Ta'ala li content nou et li ena la capacité et le pouvoir pou donne nou tout ceki nou bizin et ceki nou oulé. Donne kikene ceki li bizin peut être li facile aussi dans ene certaine mesure mais donne kikene ceki li oulé, ça li impossible pou kikene faire li. Ça li trouve dans pouvoir Allah Ta'ala même. Allah Ta'ala so trésor li tellement grand ki li pou reste intacte sans diminué par ene iota aussi, quand même si fine fini donne tous dimoune dans ça dounia-là ceki li fine dimandé. Li impé couma dire ene la source de l'eau ki pé sourcé depi en bas à mesure ou tire de l'eau depi là-haut. Donc Allah Ta'ala pas bizin faire l'économie ou bien passe la loi summertime ou bien monte taxe ou bien bloque importation et diminué consommation. Allah Ta'ala li Al-Ghani ki possède tout:

"Ceki ena dans ou possession, ça li pou fini mais ceki ena cote Allah Ta'ala, ça li éternel. Certainement Nou pou accorde à banne ki fine ena patience ene récompense ki pou meilleur ki ça travail ki zotte pé faire." (V96/S16)

[Extrait de Al Jamiat Vol.4 No.10]