Calamités …

Tout ceki pé arrivé lors ça la terre-là, c'est ceki dimoune fine faire avec so propre la main. Allah Ta'ala li Juste. C'est insaan ki faire l'injustice. Et par cela li mette li même dans difficulté.

Allah Ta'ala fine révèle Deen pou le bien être de l'humanité. Si dimoune vive d'après commandement Allah Ta'ala, personne pas pou ena aukene problème. Dimoune tombe dans difficulté acoze dimoune pas pé faire ceki li ti bizin faire. Li cause menti au lieu cause vrai. Li faire malhonnêteté au lieu être honnête. Li garde rancune au lieu donne l'amitié. Li pas hésité prend la vie dimoune quand li trouve so l'avantage dans faire li. Si dimoune pas ti faire tout ça-là, tout dimoune ti pou ena tranquillité et tout dimoune ti pou vive avec la paix et en repos. Dans Qour'aan-e-Kareem, Allah Ta'ala dire:

"Calamité fine envahir la terre et la mer acoze ceki la main dimoune fine faire. (Allah Ta'ala fine faire ça) afin pou faire zotte goûte (banne conséquence grave) de impé ceki zotte fine commette pou zotte capave rétracté." (V41 / S30)

Ça verset-là montré ki tout difficulté ki dimoune pé gagné lors la terre c'est impé conséquence de ceki dimoune même fine faire avec so propre la main. Coumsa même ça verset-là li inclure banne calamités, désastres naturel, banne épidémies et banne maladies ki entier globe pé souffert. Tout ça-là c'est résultat de so mauvais comportement.

Mais Allah Ta'ala li boucou bon. Li pas faire ça pou punir nou. Li faire ça pou dimoune gagne so coup et li dressé. Li dessanne ça banne calamités-là zisse comme ene "warning" et ene avertissement pou dimoune capave repentir et rente dans l'ordre avant ki li trop tard.

… Solution et remède

Dimoune pé suggère et propose ene quantité mesure pou attaque ça banne problèmes-là. Mais ena bien tigite ki pé propose ceki bizin. Banne moyens et banne mesures ki pé proposé pou remédié ou pou barre ça banne problèmes-là c'est banne mesures secondaires. L'essentiel dans tout ça-là c'est éradique le germe même de ça abcès-là. Et ça c'est la désobéissance d'Allah Ta'ala. Dans Qour'aan-e-Kareem à plusieurs reprises Allah Ta'ala  fine attire nou l'attention ki péché li racine de tous banne problèmes ki insaan pé subir. Donc la seul solution c'est arrête faire péché et dimane pardon pou banne péchés ki fine commette auparavant. C'est là-dans même ki ena solution de tous nou banne problèmes. Zordi jour quand toute sorte maladies pé menace nou bien être et bien être de nou proches, pena aukene chemin pou protége nou de ça apart tombe dans chemin Allah Ta'ala. Dans ene hadice ki trouve dans Abou Dawoud, Rassouloullah ‎(Sallallaahou A'laihi Wasallam)‎ fine dire:

"Celui ki attrape le principe dimane pardon, Allah Ta'ala pou faire ene chemin sorti pou li de tout difficulté, et pou donne li soulagement de tout souffrance et pou accorde li so besoin dans ene manière ki li pas attane." (Abou Dawoud)

Nou pou faire nou même ene grand du bien si nou reste engagé dans dimane pardon avec Allah Ta'ala pou banne manquements et banne erreurs ki nou fine capave faire. Ça li ene moyen très très efficace pou protége nou de banne difficultés dans tous so banne formes. Li bon nou conseille nou banne zenfants, banne dimoune dans la caze et nou banne proches pou faire li.

[Extrait de Al Jamiat Vol.4 No.10]