Faire khutbah jum'ah assizé ?

Selon ene hadice ki trouve dans Sahih Mouslim, Hazrat Ka’ab Bin Ujrah ‎(Radiyallahou anhou‎)‎ fine rente dans masjid dans ene l’heure ki Abdurrahmaan Bin Ummul Hakam ti pé faire khutbah (Jum’ah) assizé. Lors ça Hazrat Ka’ab Bin Ujrah ‎(Radiyallahou anhou‎)‎ fine dire : « Guette ça mauvais-là ! Li pé faire khutbah assizé. Et pourtant Allah Ta’ala fine dire : « Quand zotte trouve commerce ou bien ene distraction, zotte galoupe vers ça et zotte quitte ou dibouté. »

Explication :

Ene fois Nabi ‎(Sallallaahou A'laihi Wasallam)‎ ti pé faire khutbah Jum’ah quand ene caravane de banne commerçants fine rente dans Madinah depi Shaam (nom ene l’endroit). Ene groupe de banne ki ti pé écoute khutbah fine levé et fine alle vers ça banne commerçants-là. Et ici Nabi ‎(Sallallaahou A'laihi Wasallam)‎ fine continué faire so khutbah en présence douze personnes seulement. Allah Ta’ala fine révèle ça ayat-là pou empêche banne-là pas refaire ça.

Dans le verset cote Allah Ta’ala fine désapprouve ceki zotte fine faire, là-bas li montré ki Nabi ‎(Sallallaahou A'laihi Wasallam)‎ ti pé faire khutbah en posture diboute. Donc Hazrat Ka’ab Bin Ujrah ‎(Radiyallahou anhou‎)‎ fine servi ça ayat-là pou désapprouve la manière ki Abdurrahmaan Bin Ummul Hakam ti pé donne khutbah. C'est-à-dire faire khutbah assizé li contraire à la pratique de Nabi ‎(Sallallaahou A'laihi Wasallam)‎.

Observation :

Si dans place dibouté, ene Imam li assizé li faire khutbah, alors techniquement pena grand différence. Surtout quand Imam pé assize lors mimbar cote tout dimoune pé capave trouve li et pé capave tanne khutbah ki li pé faire. Mais malgré ça, Hazrat Ka’ab Bin Ujrah ‎(Radiyallahou anhou‎)‎ fine bien sévère dans so critique à l’égard ça Imam-là. C’était zisse acoze ki li fine faire conte ceki Nabi ‎(Sallallaahou A'laihi Wasallam)‎ fine faire pendant toute longue so la vie. Eski ça raisonnement-là pas capave marché en ceki concerne faire khutbah en créole ? Pena aukene raison vraiment convaincante pou dire ki ici li pas capave appliqué. Toute longue so la vie Nabi ‎(Sallallaahou A'laihi Wasallam)‎ fine faire khutbah en arabe. Faire khutbah en créole li conte ceki Nabi ‎(Sallallaahou A'laihi Wasallam)‎ fine pratiqué pendant toute longue so la vie. Donc d’après ça raisonnement-là faire khutbah en créole mérite être désapprouvé sévèrement.

Pou banne ‘Oulama, faire khutbah dans ene l’autre langue apart langue arabe, li ene pratique ki contraire à la pratique permanente de Nabi ‎(Sallallaahou A'laihi Wasallam)‎ et de banne Sahaba-e-Kiraam. Donc pou cela selon zotte, c’est ene pratique bien indésirable.

[Extrait de Al Jamiat Vol.4 No.11]