Négligence dans namaz

Nou ena négligence à plusieurs niveaux dans namaz. Ena ki pas faire namaz ditout. Ena ki faire necque namaz Eid et namaz Baqr Eid. Ena ene l’autre catégorie ki capave pé faire namaz jum’ah aussi. Ena ene l’autre groupe ki faire tous les 5 namaz plis so namaz taraaweeh pendant le mois de ramadhaan mais ene coup ou arrête trouve li couma ramadhaan fini. Ena ene l’autre ki ene ti pé pli bon ki faire ene deux namaz en dehors ramadhaan mais zotte pas régulier. Pli bon ki ça c’est ça groupe ki faire tous les 5 namaz mais ki pas hésité pou néglige li dans banne l’occasion couma mariage, pique-nique, fiançailles ou bien quand li en voyage. Et si li malade, li trouve ça ene pli bon prétexte pou pas faire namaz. Après tout ça-là nou ena ene groupe ki pli bon. Ça groupe-là zotte faire zotte 5 l’heure namaz régulièrement. Pique-nique, mariage, mayyat ou maladie pas empêche zotte faire zotte namaz. Zotte bien sérieux et bien stricte dans zotte namaz. Mais ici aussi ena ene manquement. Le manquement dans concentration.

Donc meilleur catégorie c’est ça catégorie ki faire 5 fois namaz avec concentration, dans so l’heure prescrite, dans masjid avec jama’at. C’est ene catégorie ki pas néglige namaz dans banne l’occasion couma mariage, pique-nique aussi. Dans maladie aussi zotte pas quitte namaz. Zotte conne l’importance namaz et zotte conné ki bizin faire li tout le temps. Parceki zotte conné ki namaz li obligatoire. Li pas ene kitchose ki bizin faire necque quand gagne le temps et quand pena narien à faire. C’est ene kitchose ki faraz et obligatoire et ki bizin tire le temps pou faire li.

Gravité néglige namaz

D’après hadice, néglige namaz li manière ene ki pena Imaan. Li pas digne pou ene musulman ki li pas faire namaz. Ene dimoune ki pas faire namaz, pou lève avec banne kaafir et banne moushrik jour qiyaamah. Selon ene hadice ki trouve dans Tirmizi, premier kitchose ki ene dimoune pou bizin ranne compte c’est namaz. Si so compte namaz li correcte, ça veut dire ki li fine passé. Mais si ça pas bon, alors li fine échoué et li fine maillé.

Ki veut dire faire namaz avec concentration ?

Concentré dans namaz pas veut dire ki ene dimoune li perdi totalement à tel point ki li pas conné même cote li été. Parceki si li arrive dans ça stage-là, li pou impossible pou li continué so namaz. Li pou blié combien rakaat li fine faire etc.

Couma pou gagne concentration dans namaz?

Pou capave concentré dans namaz, li sufi ki ene dimoune pas amène banne pensées dans so l’esprit et ni li nourri banne pensées ki vine par li même. Si malgré ça pensée-là continué vini, ça li pas affecté so namaz pourvu li pas prend plaisir dans reste pense ça banne zaffaire-là. Et pou li garde so l’esprit engagé dans namaz, li pense-pensé li faire tous so banne postures dans namaz pareil couma dire ene dimoune ki fine fecque apprane faire namaz. C'est-à-dire li pas faire namaz automatique couma dire fine pèse ene bouton et namaz-là pé roule par li même. Au lieu ça, avant li faire ene posture, li pense bien avant li alle dans ça posture-là. Par exemple avant li alle dans roukou’, li dire dans so le cœur ki mo pou alle dans roukou’ et mo pou faire tasbeeh. Et avant li dibouté li dire dans so le cœur ki là mo pou alle faire qawmah et mo bizin dresse mo le rein droite. Donc coumsa même li pense-pensé li faire so namaz couma dire li pé apprane faire namaz. C’est ene moyen très efficace pou garde l’esprit engagé dans namaz au lieu laisse li promené-promené partout.

[Extrait de Al Jamiat Vol.4 No.11]