Nabi ‎(Sallallaahou A'laihi Wasallam)‎ – Sauveur de l’humanité

Dimoune li ena pou vive dans ene façon ki distingue li de lezot espèces. Allah Ta’ala fine décrète insaan meilleur créature. Donc so façon de vive li bizin pli bon ki tout. Mais insaan pas capave conne par li même ça meilleur façon de vive-là. C’est Allah Ta’ala ki fine guide insaan vers ça façon de vive-là à travers banne Nabi ki fine vine de temps à autre dans différent l’époque. Et ça mission-là fine complété par nou Nabi le plus aimé, Hazrat Mouhammad ‎(Sallallaahou A'laihi Wasallam)‎. Donc zordi jour c’est banne ki suive so modèle même ki pé amène ene la vie ki digne à ça nom insaan ki zotte porté.

Par contre banne ki fine choisir ene ligne de conduite ki zotte même fine établi, zotte fine échoué dans résoudre problème la société. Dans banne règne pareille, la société fine reste toujours sous l’emprise de l’égoïsme, vanité, l’orgueil et matérialisme. Zotte pas fine capave réglemente zotte la vie d’après ene système bien équilibré.

D’après banne la loi ki zotte fine metté, soit banne innocent pé passe pou coupable ou bien banne coupable fine gagne trop boucou chemin sorti ki rende la société pli vulnérable. Mais d’après système ki nou Nabi ‎(Sallallaahou A'laihi Wasallam)‎ fine amené, chakene li gagne ceki li mérité. Pena injustice envers kikene. Ena banne provision ki empêche sanctionne ceki innocents sans faire dominere avec ene ki coupable et en même temps accorde le public en général sécurité et protection ki li bizin.

L’enseignement de coté Allah Ta’ala c’est ene l’enseignement ki faire dimoune suive la loi sans exerce kit pression. Li inculqué ene l’envi et désir pou respecté la loi de so Créateur ki pas bizin surveillance. Et ça désir pou reste d’après l’ordre Allah Ta’ala li créé ene l’atmosphère ki inspire ene sens de sécurité, confiance, la joie et contentement. Ki Allah Ta’ala dessane so Rahmat et so bénédiction lors Nou Nabi Hazrat Mouhammad ‎(Sallallaahou A'laihi Wasallam)‎, le Sauveur de l’humanité !

[Extrait de Al Jamiat Vol.4 No.13]