Salafi et 20 rakaat taraweeh

Salaf c’est banne Sahaba-e-Kiraam, banne Tabeines et banne Taba-Tabeines. Etre Salafi veut dire suive les principes de banne ki ti dans ça trois l’époque-là. Nou tous conné ki banne Sahaba-e-Kiraam fine tombe d’accord lors 20 rakaat taraweeh et ça fine continué être pratiqué dans l’époque Tabeines et Taba-Tabeines. Astere si ene dimoune declare li ene Salafi sans ki li accepté 20 rakaat Taraweeh, ça li pou paraite bien étonnant. Ça nom Salafi-là pas alle avec li. C’est ene fausse prétention. Ou capave appelle ou n’importe quoi. Si ou fine tourne ou le dos avec banne principes ki ti en vigueur dans ça trois l’époque-là, ça sufi pou disqualifié ou comme ene bon musulman. Après ça ki salafi ou pou été! A moins si d'après ou, salafi signifié ene ki pas ene bon musulman.

Ene bon musulman li rode l’occasion pou faire ibaadat. Ene ibaadat ki nou banne grand couma banne Sahaba-e-Kiraam, banne tabeines et banne taba-tabeines fine pratiqué li bizin ene kitchose ki d’après shariat. Donc la pratique de 20 rakaat, c’est ene de banne pratiques ki raccroche nou avec ça noble caravane – caravane de banne Sahaba-e-Kiraam, banne tabeines et taba-tabeines. Sans nou suive ça caravane-là, li impossible pou arrive lors destination. Pou illustré ça même l’idée ki Nabi ‎(Sallallaahou A'laihi Wasallam)‎ fine dire :

"Suive la pli grande majorité parceki celui ki retire li ene coté li pou être jeté dans l’enfer."

Donc celui ki tourne le dos avec la pratique de 20 rakaat taraweeh, li ene kikene ki pé isole li et retire li de ça noble caravane-là. Astere quand ou pas dans ene caravane et ou faire la folie faire trajet ou tout seul, li difficile pou dire ki ou pou réussi arrive lors destination. Si ou pas être dévoré ou bien être attaqué par banne voleurs, pirates et banne malfaiteurs, c’est ou chance. Mais faudré pas nou jouer avec nou la vie et nou expose li à toute sorte danger.

Le mois de ramadhaan c’est ene mois béni cote Allah Ta’ala so faveur immense dessane nuit et jour. C’est ene l’occasion cote dimoune bizin faire le maximum zeffort pou faire ibaadat. Li bien pas bon décourage banne dimoune faire 20 rakaat taraweeh et conseille pou contente zotte lors 8 rakaat seulement. Et ça aussi lors la base bannes prétextes inutiles. Nou bizin ena confiance lors nou banne grands c'est-à-dire banne Sahaba-e-Kiraam, banne Tabeines et banne Taba-Tabeines. Et coumsa même nou bizin ena confiance lors ceki zotte fine faire et fine pratiqué. Li pou ene faiblesse de nou part pou tourne le dos avec ceki banne Sahaba-e-Kiraam, banne Tabeines et banne Taba-Tabeines fine faire. Nou bizin à tout prix rente dans caravane de ça banne noble personnages-là et coumsa nou pou arrive lors nou destination sain et sauf par la grâce d’Allah Ta’ala.

[Extrait de Al Jamiat Vol.4 No.14]